قلتلكم راهو كل شيء في الجينات
هالمدّة العرب فاقوا و بداو يجريوا ويقوموا بتحليل الجينات باش يثبتوا إلّى الجينات العربية إلّى هي 1J و 2J متأصلة وموجودة في البلدان العربية والعرب ماهمش قطعة حبل جايبها الواد .
عاد يا سيدي قالك الأوروبيين و الأمريكان قاعدين يعملوا في خرائط جينية و هالمدّة الباحثين الأمريكان يلوجوا في خاصيات جينات الأمويين.. عاد باش مايخليوهمش يطلعوا حاجات ماتساعدش العرب… وقالك الظاهر يحبوا يربطوا خاصيتها بالإرهاب كيف ما ربطوا الإسلام بالإرهاب … ابداو العرب يخدموا على رواحهم باش يبحثوا و يطلعوا نسبة الجينات العربية في كل بلاد عربية… الدكتور والباحث الأردني خدم على السلالات منها سلالة الرسول و طلّع إلّى الأردن فيها أكبر نسبة للمخزون الجيني العربي وهو 93% منهم 72% عرب قحطانيين و21% عرب عدنانيون و قال إلّى الأردن هي “العاصمة الجينية العربية”
المنظمة التونسية لعلم الأنثروبولوجيا حبت تعمل ندوة عاد كيف سمعت منظمة الإيسسكو بالندوة اتدخلت وقالت انحب انشارك وانردهالك دولية.. المنظمة التونسية وافقت والبارح كملت الندوة الدولية في القيروان عنوانها “الأنثروبولوجيا في الثقافة الإسلامية” و شاركوا فيها رجال دين وباحثين بيولوجيين من إيران وتونس والجزائر والمغرب والكويت و تركيا و حكاو رجال الدين على علم الأنثروبولوجيا إلّى الغرب بدأ عندهم توا 100 وإلّا 200 سنة وفسروا كيفاش القرآن فيه علم الأنثروبولوجيا بالتفصيل وفسروا الموضوع بآيات وسور قرآنية و كيفاش القرآن عطي قيمة كبيرة للإنسان واهتم بيه قبل ما تتخلق الأنثروبولوجيا عند الغرب و جاوب على الأسئلة من أين وكيف وإلي أين إلّى تفنّد نظرية داروين.
ثم جاء دور الكويت وتونس إلّى خذاو كروموزوم Yواحد وخدموا عليه مع بعضهم ،الكويت لوجت على الجينات العربية في الخليج وإيران ولقات إلّى الجين العربي موش موجود في إيران أو بنسبة ضعيفة لا تذكر واستخلصت إلّى الفرس والعرب رغم الحدود المشتركة ما تصاهروش وما تزاوجوش وقعدت الجينات الفارسية مافيهاش جينات عربية
التوانسة عملوا تحليل للجينات متاع المغرب العربي و بعض البلدان في الخليج وقالوا إلّى نسبة الجينات المختلفة 7.63% والباقي بربر من أصل 13.11 إلّى هي نسبة الإختلاف بين الأجناس.
والمغرب كانت دراستها في البحث عن التركيبة الجينية في المغرب في عدة مناطق مختلفة.
المهم أن الأبحاث في الأنثروبولوجيا البيولوجية الهدف منها معرفة الخصائص الجينية لأغراض طبية و معرفة سبب الأمراض الموجودة في بعض المناطق من غير مناطق أخري ومعرفة سلوك وطبائع الأجناس …و زيد للمخابرات الأمنية باش تستعملها في ملاحقة المجرمين…
أنا عييت توا وباش نختم وانقول علاش الأردن فرقت بين العرب القحطانيين والعرب العدنانيين و الجماعة الأخري حطت العرب الكل فرد شكارة؟؟ ثم علاش خذاو كروموزوم Y من غير ما يواصلوا يخدموا على كروموزوم X كيف ما سألت باحثة مشاركة؟…
ما نكذبش عليكم بقدر ما أنا استمتعت بالبحوث بقدر ما خرجت متأسفة لأني حسيت أنو كل شيء اموجّه و الإيسسكو ماهياش داخلة في الموضوع تلعب.
