Hnani and the Family

اسرائيل تهدّد بفسخ الصفقات التجارية بينها و بين تركيا. على خاطر تركيا قالت لا للحرب و قتل الأبرياء. زعما مناش مصنوعين الإسرائيليين ؟ علاش لا يفلتوا لا كبيرة ولا صغيرة اتمس مصالحهم و أمنهم ؟ علاش السفارة الفنزولية في فرنسا تهجم عليها اليهود و لا واحد اتكلّم عليها و لا الأمن الفرنسي حماها كيف ما نحميوا أحنا العرب السفارات الأمريكية و الإسرائيلية في بلدانا؟ علاش كيف يقولوا كلمة ياخذها العالم مأخذ الجد، موش كيف ما يتكلموا العرب لا واحد يعلّق حتى على كلامهم؟
علاش الذل هذا الكل متاع حكامنا إلّى طيحولنا من قيمتنا و كرامتنا مع العالم؟ منين باش يتطور العربي و يولّي يبتكر و يخلق و هو حتى باش يفكّر ولّا يعبّر ممنوع عليه…كيفاش باش العالم يعطي قيمة لإنسان عربي و هو يعرف إلّى العربي حتى مع حاكمو و في بلادو لا عندو قيمة ولا قدر ؟
العبودية و بيع العبيد اتنحي في صيغتو القديمة، لكن الصيغة الجديدة للعبودية توجدت بالقوانين العالمية الجديدة و العبيد هم العرب و في مقدمتهم الحكام إلّى مواقفهم ما تدل كان على أخلاق العبودية.
أنا راني كتبت باش انفرّغ قلبي، خاصة بعد ما جاني تعليق من شخص ظاهر فيه من الخليج ولا مصر و قالى فيه إلّى أنا قاعدة في داري و انبث في الفتنة بين العرب و عاتبني كيفاش نحكي على المصريين و حسني مبارك.. هو كثر الهم يضحّك، اتصوروني انبث في الفتنة بين العرب الأبرياء من الفتنة و المتماسكين و المتوحدين و لّى عندهم كرامة وشهامة وعزّة نفس!!!!!!!!

Hnani Politics

آخر الأخبار تقول أن محمود عباس تنتهي ولاية رئاسته اليوم مع منتصف الليل
لذا فلن يكون سوي مواطن فلسطيني عادي
زعما في الحالة هذه إذا صارت انتخابات، شكون باش يربح؟ فتح ولا حماس؟
سؤال موش وقتو في الحقيقة لكن مادام الفلسطينيين جبدوه علاش ما نجبدوش أنا .

Hnani Politics

أول خطوة اسرائيلية لبحث خطة حسني مبارك، تبدأ اليوم بزيارة وفد اسرائيلي لمصر و الإلتقاء برئيس المخابرات المصرية. هل أن خطة مبارك هي خطة استخبراتية بالأساس؟ هل يزور الوفد الإسرائيلي مصر للوقوف على أهمية المعلومات التي سوف تقدّمهامخابرات مصر للقضاء على المقاومة، ومنها تحدد موقفها من قبول الخطة أو رفضها؟
في نفس الوقت كندوليزا رايس سوف تستقبل المبعوثين العرب ، ما عدى مبعوث قطر و عمر موسي ؟ لماذا استثناء قطر و رئيس الجامعة العربية(مصر) مع العلم أن قطر و مصر لهما أكبر علاقات مع اسرائيل.
مسكينة فلسطين و هناني البربرية، إلّى شدوهم العرب و بدعوا بحالهم. بورقيبة الله يرحمو قال للفلسطينيين اتلهاو بقضيتكم و ردوا بالكم اتسيبوها في يدين العرب… هاو النتيجة، ولّا مازالت ماهياش باينة؟
الجدود العرب و المسلمين عطاو فلسطين لليهود، والملك فيصل هو من عمل المعاهدة مع الأنقليز و توا الأحفاد طلعوا ذكيين و وطنيين كيف جدودهم

Hnani Politics

توا نسمع في محلل لبناني يحكي على غباء السياسيون و المحللون العرب، عاد من بين ما قال : تركيا في حرب لبنان واسرائيل عام 2006 كانت إلى جانب اسرائيل في كل المجالات و خاصة العسكرية، ولم يكتب أي صحافي لبناني أي كلمة للتنديد بتركيا…اليوم تركيا مع الفلسطينيين، والعالم الكل يعرف…بعد خطاب أردوقان إلّى يندّد فيه بشدّة العدوان الإسرائيلي، وقال كونو يتكلّم بصفته تركي من سلالة الدولة العثمانية التي حمت اليهود في وقت مضى، خرج صحافي لبناني وكتب مقال طويل وعريض يندّد بتركيا سليلة الدولة العثمانية على أساس أنها دولة من سلالة الدولة العثمانية الإستعمارية، التي سبق وأن احتلّت لبنان .

حاجة أخري ، يظهرلي يا جماعة مصر باش تاخذ قطاع غزّة، الخطة متاعو مع سركوزي هي وضع غزّة تحت السيطرة و التسيير المصري، حسني مبارك طلع قوي قوي قوي، يا جماعة قوتو فاضت على مصر و باش توصل لغزّة

Hnani Politics

اسرائل قالت منذ ساعات أنها تسمح بتوزيع المساعدات في قطاع غزّة. بعد هذا الخبر يجينا خبر يقول أن الحكومة المصرية أغلقت بصفة كاملة معبر رفح اثر الهجوم البري على غزّة…
باش نتأكّد من الخبر مشيت شفت قنات مصرية عندها شعار الأهرامات، لقيتها تعدّي في كلمة قديمة متاع الرئيس موش حسني و موش مبارك يقول فيها أنو حل المعبر للجرحي الفلسطينيين. رجعت لقنوات أخري نلقي الرئيس التركي يطلب من مصر باش اتحل معبر رفح ، و مصر تغلق المعبر بصفة نهائية.
منين باش انشدوها مصر؟ أيام الحصار و في بداية الحرب ترفض باش اتحل معبر رفح لإلتزامها بالإتفاقيات الدولية و الصحيح مع إسرائيل، و من بعد حلتو قطرة قطرة. اليوم بعد ما وافقوا أسيادها بتوزيع المعونات اتسكرو بصفة نهائية.
يا ولادي فسرولي اللغز راهو راسي ما عادش فيه .
موش عندو الحق الحبيب بورقيبة الله يرحمو كيف قال عام 1965 يا فلسطينيين ردو بالكم تخليو القضية متاعكم في يدين العرب، و تردو قضيتكم قضية عربية؟

Hnani Politics

نهارين وانا نقرى في المدونات و نتفرّج على التلافز العربية، و قلبي قريب يسكت ، من كثرة الحزن على ضحيا المجزرة الإسرائيلية إلّى مازالت متواصلة، و من الحزن و الغضب إلّى حسّيتو في المدونات…رغم إلّى أنا حالفة بيمين ماعدتش نتفرّج ولا نسمع أخبار العرب. اليوم مع التسعة متاع الليل، تفرّجت على برنامج على الهواء فيه نقاش مع سفير فلسطين في مصر و مدير مركز بحوث ما نعرف شنوا في مصر.. نسمع في كلام عملّى ترهويجة في مخّى ، شكّيت في القناة، ثبّتت نلقاها هي القناة المصرية، و بالأمارة من فوق قمّا شعار الأهرامات و من تحت قمّا شريط مكتوب فيه عدد الشهداء الفلسطينيين جراء المجزرة الإسرائيلية… و زيد مكتوب فيه أنو حسني الموش مبارك يطلب باش فيسع توصل المساعدات لأهلو في غزّة…
المهم في الحكاية أن الأخخخخخخ سفير فلسطين في مصر ، يتكلّم مرتاح و بكل راحة و قال بالدم البارد: مصر من حقها باش تسكّر المعبر على خاطرها ملتزمة بقوانين دولية، وزيد حماس هي سبب المجزرة، على خاطرها ما سمعتش كلام مصر كيف قالتلها سيّب الحكم في غزّة و راك ماعندك حتا شرعية.
والمسؤول المصري قال: كان انحلو معبر رفح معناه نعترفو ضمنيا إلّى إسرائيل ما هياش محتلة فلسطين، والفلسطينيين عندهم دولة وحدود يحكموا فيها، و من هنا ما عدناش انجموا نتكلموا على اسرائيل كونها دولة محتلة لفلسطين.
عاود اتكلّم الأخخخخخخ المسؤول الفلسطيني و قال بنبرت تهكّم و شبه ابتسامة، حماس تقول إلّى هي فكّت الهدنة على خاطر ثلاثين فلسطيني ماتوا في ستة أشهر نتيجة الحصار، هاي توا كانت السبب باش إسرائيل تقتل 300 فلسطيني في 24 ساعة
و زاد قال الأخخخخخخخخخخخخخ السفير الفلسطيني : الناس إلّى اتهاجم في مصر ( يقصد في سوريا و حزب الله) هوما ناس عندهم خلفيات و غايات، و الدليل علاش سوريا ما تخلّيش جماعة حماس يرميوا صواريخ على إسرائيل من أرضها، و علاش حزب الله ما يضربش إسرائيل بصواريخو؟؟؟ علاش هوما يتشبثوا بالإتفاقيات الدولية و يطالبوا مصر باش تخالف الإتفاقيات الدولية وتحل معبر رفح؟
أيا يزّيني و يزّيكم ما ناش ناقصين وجيعة راس،

Hnani Politics

أين العرب؟ أين المسلمين؟ أين الإنسانية؟ أين حقوق الإنسان؟ أين الجامعة العربية؟ أين الأمم المتحدة؟

Hnani Politics

و الفاهم يفهم…

Politics 4 November, 4 Novembre, liberte

هالأيّامات بديت نتطّوع في الإنتخابات متع أمريكا و نعاون فاكل الوليّد أوباما على خاطرني فدّيت من الجمهوريّين و يضهرلي الّي ماكّاين كيفو كيف القريّد إلّي شادد الحكم توّا.

عاد باش نغتنم ها الفرصة و نكتب مقارنة صغيرة بين تجربة ممارسة السياسة في تونس و في أمريكا:

كيف تدخل للسياية في تونس تولّي يا معارض ياّ رحّاي فارينة… في أمريكا ما يستعملوشي كلمة معارضة…

كيف تتكلّم في السّياسة في أمريكا، بوك يدور لأمّك و يقوللها شوفت هالولد طالع خشين لبوه… في تونس بوك يكرّز على أمك و يقلّها : هالمصيبة قدّاش متعّبني…

في أمريكا كيف تتدخل للسياسة تزيد تعرف حقوقك و تحاول تعاون غيرك باش هوما زادا يعرفو حقوقهم و يضمنوها… في تونس يفكّوهملك…

في أمريكا كيف تناقش في السّياسة، تحاول تدافع على فلسفة، قيم و منهجيّة… في تونس يا إمّا تشد بن علي و تألّهو و إلاّ تمسح بيه الأرض…

في أمريكا كيف تختلف مع مرشّح الحزب إلّي تشجّع فيه، نورمال ياسر، تنجّم تعبّر على رايك… في تونس،  مصيبة الولاء الأعمى….

إلخ إلخ إلخ…

Politics

By Bachbouch 

اليوم قالو في الأخبار إلّي سوق الأسهم كرايمو إدّقدقت  ، بنوك تسكّرت و أخرى تباعب بإخ تف… سي جورج بوش شاد صحيح ما يخرج مالحكم إلا ما يقلبها صافيها على عاليها: حرب أهليّة في العراق، حرب في إفغانستان إلّي زادت قوّات القاعدة في بلاصط ما تضعّفها… بن لادن دبّر إشهار عند أصحاب العقول إلّي تشكي لربّي بوبلاش… حماس شدّت البرلمان… كنت نعبّي الإسّونس بنص دولار الّيترة و توّا الّيترة ولّات بدولار و نص… ميزانيّة أمريكا ملّي كان فيها فائض قياسي من بعد كلنتن ولّا فيها عجز قياسي في جرّة ها المصطّك… أمّا برجوليّة تعجبني فيه الرّوح الرّياضيّة، ما ثمّاش تلفزة ولّا جريدة ما عبثتشي بحالو، والوليّد بوش شايخ والا عالا بالو… هاو فيديو باش يعطيكم لمحة على الطقطوقة إلّي يحكم في العالم أجمع

Politics