مشهد 3 من سيناريو الحياة
-
داخل المقهى/ ليل
سامي، عصام، و نادر مجتمعون حول آخر طاولة ، يتقاسمون شيشة.
نادر يعمّر ورقة بروموسبور
سامي: يزي من لعب البروموسبور؟ ماكش باش اتولّى غني لوكان اتبوس عينك..
نادر، منهمك في تعمير القصاصة، يتجاهل كلام سامى X 2 / 2 X 1 / X X X / X 1 2
عصام: خلّيه يحلم بالثروة، خير ما يولّى يشوف كا شيء أظلم قدامو…
نادر يرفع رأسه و يوجّه الكلام إلى عصام
نادر: أنا نحلم باللعب في البروموسبور، لكن خونا لطفي إلّى غايب علينا توا ثلاثة أيام، يحلم باش يلقي كنز مع هاك الدرويش…
سامي: أنا بالرسمي ، خايف عليه، الراجل ما عادش يحب يسمع حتا كلمة منا… الدرويش ساكنلو مخو، و خلّاه يسرق في ذهب أمو، باش يشريلو البخور…
نادر: دفع تروة للمتحيّل ، قال شنوا، باش يطلّعلو الكنز!!!
عصام: حتا دارهم عندو مدة ، ما مشالهاش، خايف من والديه، وناوي ما يرجع إلّا ما يلقى الكنز!
سامي يخرج من جيبه خريطة جغرافية، يبسطها على الطاولة ، و بإصبعه يشير إلى الحدود الجغرافية …
سامي: اتصوروا، الحدود هذه، ماهياش موجودة؟ اتصوروا كان جينا انجموا نمشيو للبلاد هذه؟ ( يشير إلى أمريكا) من غير فيزا…
نادر: بالله أشكون عمل هالحدود؟ لا ترحملو والدين..
عصام: كان على الأقل يقسّم الخيرات بالعدل… علاش بلدان فقيرة و بلدان غنية؟؟؟
سامي: طلبت خمسة مرات الفيزا باش نمشي ل أمريكا، و شادين صحيح باش يرفضوا المطلب متاعي… أنا والله لاني باش انسيّبهم…
عصام: مالا كلاوك في 100 دولار كل مرّة؟ ملا خبيزة جاتهم…
سامي: كيف الخبيزة إلّى جات للمكتب متاع الهجرة إلّى تتعامل معاه…
عصام: خليهم خويا صحّة ليهم، هوما لقاو الخبيزة ، واحنا نقعدو صايمين…. أنا يا أخي فدّيت من البطالة، كان ما نخرجش نهبل… حتا العايلة ولّات فادة مني ، و حاسبتني ضايع ، رغم أستاذية الأنقليزية إلّى عندي…
سامي ياخذ الشيشة من نادر
عصام: مانيش عارف علاش مالا هالعولمة؟ امكسريلنا روسنا بيها، … بالله انتوما فاهمينها؟
سامي: العولمة متاع السلعة ، و البنوك، و الثقافة …
عصام : و العباد؟ و الخدمة؟ علاش ما يدخلوش في العولمة؟ و زيد انتوما ريتو حاجة دخلت غير السلعة و البنوك؟
نادر يضحك
نادر : أنا شفت الشريكات كيف المحمصة… و كل شريكة اتجيب معاها العروفات من بلادها، واتخدّم كعبتين توانسة بشهرية كيف شهرية الحاكم…. تعرفش كيفاش ؟ كان نطلبوا اللجوء السياسي، توا ندخلوا في العولمة….
عصام: أنا خوك لا نحب السياسة ولا نعمل السياسة…
نادر: الحاجة إلّى اتهبّلني ، بلادنا يدخلولها من غير فيزا، واحنا يلزمنا انكتو الفلوس باش نطلبو الفيزا و يرفضونا…
عصام: أنا برجولية، كان ما يجينيش كنتراتو الجمعة هذه، ناخذ فلوسي، وانشوف كيفاش نحرق..
عم مختار صاحب المقهى، قاعد خلف الكاسة، و المشموم على أذنه
عم مختار: ( يفتح كنش ) سامي، عصام و نادر ، يلزمكم اتخلصو الفاتورة… راهي ولات رزينة
سامي: باهي عم مختار، غدوة انخلصوك في الفتورة الكل
عم مختار: موش مشكل ، مالا نستناكم غدوة…
