Hnani and the Family

قاعة الجلوس في دار عائلة حمادي
سليم أمام الحاسوب ، أمه لطيفة داخلة في يدها طبق فيه زوز قهاوي و صحن مقروض… اتحط الطبق على الطاولة ، تقعد قدام التلفزة، تترشّف قهوتها .
سليم: أمي، اتحب نحكيلك نكتة؟ بعثوهالي في الفايس بوك
لطيفة الأم: (تترشّف في قهوتها) أحكيلي ، خلّيني نضحك شويا… حتا هي التلفزة ، ما فيها كان النكد
سليم : ( يدور) قالك يا للا ، فمّا زوز نساء ، وحدة تونسية حامل ، و الأخري أمريكية ما عندها شيء في كرشها… هبطوا يعوموا في البيسين.. بعد ربع ساعة، التونسية خرجت بلاش صغير ، و الأمريكية خرجت بصغير في كرشها… تعرفش علاش؟
لطيفة: ووه يا لطيف كيفاش يصير هذا؟ اللطف يا ربي!!
سليم: (يضحك) أشبيك تفجعت يا بنتي؟ راهي نكتة… باهي قلي علاش صارت الحكاية؟
لطيفة: ما نعرفش ، قلي انت…
سليم: الجنين التونسي، حرق لأمريكا
لطيفة و سليم يترشقوا بالضحك… و لطيفة قريب تشرق…
حمادي الأب من خارج الغرفة: أنا راني ندفع في دم قلبي للأنترنات و التليفون،( يدخل للبيت) موش باش اتلوّج بيها على النكت، يا سي الشباب…
سليم: تعرف إلّى الفايس بوك عملت بيه في شهر، قريب 200 صاحب؟ في الحومة و الكلية، عمري كامل ما عملتش العشر متاعهم…
لطيفة: ( مازالت تضحك) مالا قلتلي سي وخينا الجنين، حتا هو يحب يحرق؟ هذيا نكتة بليدة متاع الشباب إلّى ما يلوّج كان على الحرقة…
حمادي: ( يترشّف القهوة) الشباب متاع توا يا لطيفة، ما عندهم حتا حس بالوطنية، كان يلقاو يبيعوا البلاد و يخرجوا منها… أنانيين و ما يحبوا كان الفلوس
سليم: بابا أشبيك ردّيتها مشكلة؟ الأنترنات راهي خلّات العالم من غير حدود… العولمة يا بابا، ما سمعتش بيها؟
حمادي: أقرا على روحك خيرلك، و سيّب عليك من الأوهام، قالك الأنترنات باش اتنحي الحدود!!
سليم: ماهمش أوهام، شوف قدّاش عندي أصحاب؟ من العالم الكل…
لطيفة: تتذكّر يا حمادي ، كيف كنا شباب، كيفاش كنا نحلموا بعالم من غير حدود؟ و فيه العدل و البروليتاريا تحكم فيه؟
سليم: مالا علاش ماتحبونيش نحلم ؟ هاو طلعت عندنا نفس الأحلام ..
حمادي: صحيح، لكن العالم متاعنا و العالم متاعكم ، ماهمش كيف كيف… ما يتقابلوا في شيء …
سليم ( يضحك) عالمكم متاع اديولوجيات ، و عالمنا متاع فلوس، موني، أرجون…
حمادي: ( يتنهّد) للأسف (يخرج من البيت

Hnani 7KAYIT HNANI

نهار 10 ديسمبر 2008 يوصل عمر قانون حقوق الإنسان 60 عام، العمر القانوني التونسي متاع التقاعد… تعب و تعّب في جرتو الجماعة إلّى متبعتو.. الحروبات و الإبادات، و الظلم و القهر، غلبوهم.
اتقول عليه كان يستنى في التقاعد بالدقيقة و الدرج، ما حبّش يطلب زيادة عام ولّا عامين ، ولّا خمسة أعوام في الخدمة كيف ما يعملوا الكبارات … ما صدّق وصل للتقاعد ، عمل مطلب باش ياخو التسكرة متاعو نهار 7 نوفمبر، و يهج من العالم هذا نهار 14 نوفمبر… المسكين قال ماعادش فيها… نهار 14 نوفمبر نقصد ربي و نمشي نقعد وحدي في محطّة فضائية عالمية إ س أ، قريبة للسماء السابعة، حتى لين ربي يهز أمانتو.

Un exemplaire de la Déclaration universelle des droits de l'homme sera envoyé le 14 novembre par la navette spatiale Endeavour à bord de la Station spatiale internationale (ISS), a annoncé mercredi l'Agence spatiale européenne (ESA) dans un communiqué

Hnani 7KAYIT HNANI

اليوم، الطقس ربيع ، و الشميسة زارقة، هزيت روحي و قلت نمشي نعمل دورة في الربط… كيف العادة خويا الحاج كلوف شادد راس النهج و يتمتم وحدو…
صباح الخير يا حاج ، نهارك زين يا هناني ، فين قاصدة ربي؟
قلتلو: يا حاج راني حبيت نمشي نعمل دورة في الربط، وانشوف حوانت التونسي نلقاش فيهم حويجة جديدة.. قالولي سكروا منهم برشا حوانت…. وانت شبيك قاعد اتكرم وحدك؟
قالي: ما تفرجتش على الجزيرة البارح؟ ولّا باقي مازلت كيف العادة مع الفرنسيس؟
قلتلو: ان شاء الله خير يا حاج… أشنوا الجديد؟ راني نعرف أخبار الجزيرة ما فيها كان إلّى يوجع القلب…
قالي: مشكلة يا هناني… العاالم حطنا في المرتبة 143 … اتصوّر الفريق الوطني تولّى رتبتو 143؟؟
ضربت على صدري و قلتلو: اللطف علينا يا حاج كان انجيو 143 … و الله كونش راهو المدرّب و المسؤولين متاع الجامعة و الوزير متاع الرياضة ، طارو في لحظة… مالا يا حاج!! علم الربط في الرتبة 143؟؟؟ يستحيل الربط يقبل الشيء هذا…
قالي: بالشويا على روحك يا هناني، شفت كيفاش دخلت بعضك على الفريق الوطني متاع الكورة؟؟ و ردّيتها علم و درابو الربط …
مالا يا حاج، ماتقلّيش فمّا حاجات أخرى غير الرياضة يتهز فيها الدرابو؟… عاد الله خير كان يولّى 143 !!!
يا هناني، توا نعرف إلّى مخك حدو حد الكورة، و صداء المحاكم ، و أخبار مهتّد و نور… و رغم هاكا باش انقلّك إلّى الربط جاء في المرتبة 143 في التعبير الكتابي و الشفاهي…
ربي يلطف بينا يا حاج، بلاد ما تقراش، ما تطالعش،مالا با ش ترسب؟؟؟
ههها ضحّكتني و ما عيني في ضحك يا هناني، ولّيت تتكلّم بالعربية؟ اييه نعم يا هناني، ربطنا دوبل، و التلافز اتعاير فينا و اتقوللنا يا مدوبلين، و حاشاكم ، يا بهايم في التعبير الكتابي و الشفاهي … ماعاد شيء يتخبا يا هناني، توا كل شيء بالفضايح..
أشكون علمهم بالرتبة متاعنا؟تلقاه واحد من الربط ماهوش باهي ، هو إلّى هز بطاقة الأعداد متاع الربط و وراهولهم!!
أنا ، و راسك يا حاج، كيف يدوبل واحد من ولادي، لا نقول لحتا بشر راهو ولدي دوبل… انخاف عليه من ولاد الحومة ، يعبدوه ويولّيو في جرتو و يقولولو يا مدوبل، يا مدوبل… ماهو يتعقّدلي يا حاج، و ممكن يقطّع الكتب الكل و ما عادش يمشي للمكتب…
بطاقة الأعداد ولّات اتجي من البرّة يا هناني ، و العالم يسمع بيها قبلنا… ماهو الإمتحان مشارك فيه العالم الكل … كيف دورات كأس العالم ، ماك ما تفهم كان بلغة الكورة انت!! و الشيخ ماشي في بالو باش يخبي الرسوب ، على جماعة الربط ، لكن يا حسرة على زمان بوعنبة ، توا شيء ما يتخبا…
مالا كيفاش توا؟ آش باش يعمل الشيخ قدّام العاالم ؟ يلزمو يشوف كيفاش يسترنا ، ويشجّع على المطالعة و يعمل في كل زنقة مسرح، قالوا المسرح باهي ينحّى التلعثيمة و التوكويك و حمورية الوجه..
ما قعدش ساكت الشيخ، كذّب حكاية الرسوب، و عاقب الناس إلّى طلعت الخبر في الربط.. و نبّه على كل واحد ينطق بكلمة مدوبل… و زاد بعث للتلافز العربية ممثّل معتبر، قاري مسرح واقتصاد ما عندوش التلعثيم ، و يعرف يحسبها و هي طايرة، باش قال للعالم الكل، إلّى ربطنا موش مدوبل، و العدد و الرتبة غالطين ، و يطالب باش يعاودوا تقييم ورقة الإمتحان متاع الربط… كيف ما انقولوا دوبل كوركسييون…
ربي معاه يا حاج، هي كلمة دوبل كوركسيون فيها كلمة دوبل و ربي يستر

Hnani 7KAYIT HNANI Add new tag

الإبادة العرقية و الإبادة المذهبية ، اللطف علينا من هالإبادات ، الحمد لله بلادنا فيها مذهب واحد ، مذهب والدينا و مذهب جدودنا… من وقت جانا سيدي سحنون ، واحنا مرتاحين من حكاية المذاهب و مشاكل الإبادة…
بلادنا فقيرة من الثروات الطبيعية ، لكنها غنية بالثروة البشرية و بتاريخها و تلاقح الحضارات إلّى اتعدات على بلادنا… مثلا، تلقى فيهم الأبيض و الأسمر و القمحي ، و العينين الزرق و الخضر و الشهل و الكحل… و الشعر الأصفر و الأكحل لرطب و المشعشط…ناس طوال و ناس قصار… ناس اتحب فريق الكورة هذا و ناس اتحب فريق الكورة لاخر… ناس اتحب تسهر في الشارع و ناس اتحب تسهر في الدار… ناس تعوم بزوز قطايع و ناس تعوم بدبشها… ناس شبعانة، و ناس جيعانة… ناس تخدم و ناس بطّالة…. ناس قاعدة في البلاد وناس هاجة… الحمد لله على كل هالإختلافات إلّى هي نتيجة التاريخ العريق متاعنا ، و تعاقب الحضارات على بلادنا… الحمد لله و الشكر لله
إختلاف واحد امقلّق راحة عمار… و ماهوش عارف كيفاش يعمل معاه…باش ما يهدّدش الثروة البشرية متاعنا ، و بلادنا تولّى في أمان و ترتقي لصف البلدان المتقدمة و المزدهرة… يقتلو بالعرق بالعرق ؟ وإلّا يعملو عملية إبادة ؟… ماهو، موش ساهل باش اتبدّل تركيبة المخ واتردو كيف ماتحب!!!…
على كل ، عمار ماهوش ساكت على هالحكاية و قاعد يخدم ليل و نهار في حملة إبادة الإختلاف هذا… وأساسا إبادة المدونات … و الحمد لله الذى لا يحمد على مكروه سواه…

Hnani 7KAYIT HNANI

بعد ما صار لمدوّنة الناقد و توا لمدوّنة خيل و ليل… مخّى وقف، ما عدتش نعرف أنا باش مقتنعة، و لا حتا أشنوا رايي في حكاية تزويد العرب بالتكنولوجيا….

الشبح الجديد ، ولّى قاعد يفرقع في المدونات ، هذا ما يرحمش، يقتل ضربة وحدة…. الذكر هذا( مانجمش انقول عليه راجل على خاطرني مازلت نعطي قيمة لصفة راجل) ، عاد قلت، الذكر هذا ، انسان وصل باش اتعلّم تكنولوجيا الأنترنات ، على مستوى عالي… لكن شنيا كانت اختراعاتو وابتكاراتو؟ بالطبيعة ،ماهياش  حاجة تنفع البشرية ، كيف صنع كمبيوتر و إلّا برمجيات تتباع للعالم … مخو الكل حطو باش يعس على الناس إلّى ما تعجبوش، و يبعثلها قمبلة بالأنترنات تهدّلها ديارها Read more…

Hnani 7KAYIT HNANI

ما عادش فيها صبر يا هناني أختي، أم كلثوم قالتها من هاكالعام، للصبر حدود…
أشبيك يا حاج؟ أشبيك اتدور كيف الزربوط؟
سامحني يا هناني، مانيش باش نقعد معاك، راني توا خارج و مانجّمش نزيد نصبر درج…
فين قاصد ربي؟ ماشي للإستعجالي؟ ماك لاباس؟
لا يا هناني، مانيش ماشي للسبيطار… ماشي باش نقدّم شكايا لجماعة حقوق العباد
اللطف عليك يا حاج …سمعتهم يقولولها حقوق الإنسان ، موش حقوق العباد… أشكون اتعدالك علي حقوقك؟ Read more…

Hnani 7KAYIT HNANI

كيف نهار اليوم ، نهار جمعة من عام 1980 كانت فيه أوّل أسعد ذكرى في حياتي…
في الفجر قام بيا الحس، هزّوني لسبيطار الرابطة … دخلوني لقسم الولادة، لوجولي على فرش فارغ، ما لقاوش… قعدت على حافة فرش .. من بعد حطوني في غرفة الولادة على سرير الولادة…البيت معبية بنساء اتصيح يا ربي و يا محمّد… أنا الوجايع تمشي واتجي.. نتوجّع من غير حس… و نستنا في الطبيب باش يجي يقلّى كيفاش نعمل باش نولد من غير وجايع … ماني قريت إلّى فمّا ولادة بلاش وجايع… Read more…

Hnani 7KAYIT HNANI

يا لطيف ألطف بينا يا هناني أختي، البارح قالولي إلّى تونس هي الرابعة في العالم في نسبة الطلاق…و السبب الرئيسي هو كيف يبدا الميزان بين المرأء و الراجل موش متوازن..
آنا ميزان يا حاج كلوف؟ أشنوا يلزمهم يوزنوا قد قد؟
مالا يا هناني،. قالك يلزم كل شيء يكون قد قد ،الشهايد كيف كيف، الشهرية قد قد و العيلات من نفس الحالة، ماكانش ،الطلاق لازم لازم
فينو الحب يا حاج يا خويا؟ ماتقلّيش حتا الحب يلزمو يكون ميزان؟؟؟ و القضية في الدار و الشارع ميزان؟؟ لا ما يجيش يا حاج، هذا ما قالش بيه ربي… Read more…

Hnani 7KAYIT HNANI

يحكيو على واحد عايش مع لفعة حاشاكم، هاك اللفعة كل يوم اتبيضلو كعبة عضم من ذهب، الراجل طمّاع ياسر.. قال: علاش نقعد نستنا كل يوم باش تعطيني عضمة ؟ موش كان نقتلها و انخرج منها عش العضم فرد مرة خير؟؟
ايا سيدي خذا كيف مانقولو فاس، و جري في فجرة اللفعة باش يقتلها، لكن وقت ما ضربها جات الضربة على ذيلها قصهولها، و ما ماتتش… Read more…

Hnani CONTES

اليوم لقيت مجموعة في فايس بوك ، اسمها ضد التزفير على النشيد الرسمي، اتعملت بعد ماتش تونس و فرانسا، و تبارك الله في نهارين وصل العدد متاع المجموعة قريب الألف… مانيش باش انقارنها بمجموعات أخرى عندها أهداف و غايات اتهمنا و أصلحلنا، ولّى العدد متاعها يتقدّم كيف الفكرون

لازم اتشوفو الفيديو هذا

http://www.facebook.com/video/video.php?v=1043901182852&ref=nf

ما نعرفش كيفاش انحطو لكن موش مهم، المهم توصلوا باش اتشوفوه و تعطيوني رايكم

Hnani 7KAYIT HNANI