Hnani and the Family

الإنسان العادي ملّى يتخلق لين يموت وهو يقاوم في مشاكل الحياة.. المرض و الجوع والبرد و البطالة و الظلم والتخلّف… و الإنسان إلّى ما تتوفرلوش ظروف و آليات مقاومة مشكلة من المشاكل ،يفقد التوازن متاعو ، و اترصيلوا يموت من غير عمر كيف مانقولوا.
فمّا ناس فوق المشاكل هذه، عندها كوارث طبيعية كيف التسونامي ، والجفاف و الزلازل، و كوارث بشرية كيف الإستعمار و الحروب الأهلية… الكوارث هاذم لثنين عندهم نفس المفعول ونفس النتيجة… لثنين كيف يهبطوا على بلاد يدمروها و يقتلوا عبادها…و الناس يلزمهم يقاوموها باش ينجموا يعيشوا على أرضهم بسلام و ما يغادروهاش .. العلماء بكل ما وصلولو من تقدّم ، عاجزين على حل وانقاذ الأرواح البشرية من الكوارث الطبيعية الناتجة على غياب التوازن البيئي . عاد كيفاش جماعة السياسة باش يحلوا مشاكل الكوارث البشرية في غياب التوازن بين الضعيف و القوي ؟؟؟

Hnani خواطر

نهارين وانا نقرى في المدونات و نتفرّج على التلافز العربية، و قلبي قريب يسكت ، من كثرة الحزن على ضحيا المجزرة الإسرائيلية إلّى مازالت متواصلة، و من الحزن و الغضب إلّى حسّيتو في المدونات…رغم إلّى أنا حالفة بيمين ماعدتش نتفرّج ولا نسمع أخبار العرب. اليوم مع التسعة متاع الليل، تفرّجت على برنامج على الهواء فيه نقاش مع سفير فلسطين في مصر و مدير مركز بحوث ما نعرف شنوا في مصر.. نسمع في كلام عملّى ترهويجة في مخّى ، شكّيت في القناة، ثبّتت نلقاها هي القناة المصرية، و بالأمارة من فوق قمّا شعار الأهرامات و من تحت قمّا شريط مكتوب فيه عدد الشهداء الفلسطينيين جراء المجزرة الإسرائيلية… و زيد مكتوب فيه أنو حسني الموش مبارك يطلب باش فيسع توصل المساعدات لأهلو في غزّة…
المهم في الحكاية أن الأخخخخخخ سفير فلسطين في مصر ، يتكلّم مرتاح و بكل راحة و قال بالدم البارد: مصر من حقها باش تسكّر المعبر على خاطرها ملتزمة بقوانين دولية، وزيد حماس هي سبب المجزرة، على خاطرها ما سمعتش كلام مصر كيف قالتلها سيّب الحكم في غزّة و راك ماعندك حتا شرعية.
والمسؤول المصري قال: كان انحلو معبر رفح معناه نعترفو ضمنيا إلّى إسرائيل ما هياش محتلة فلسطين، والفلسطينيين عندهم دولة وحدود يحكموا فيها، و من هنا ما عدناش انجموا نتكلموا على اسرائيل كونها دولة محتلة لفلسطين.
عاود اتكلّم الأخخخخخخ المسؤول الفلسطيني و قال بنبرت تهكّم و شبه ابتسامة، حماس تقول إلّى هي فكّت الهدنة على خاطر ثلاثين فلسطيني ماتوا في ستة أشهر نتيجة الحصار، هاي توا كانت السبب باش إسرائيل تقتل 300 فلسطيني في 24 ساعة
و زاد قال الأخخخخخخخخخخخخخ السفير الفلسطيني : الناس إلّى اتهاجم في مصر ( يقصد في سوريا و حزب الله) هوما ناس عندهم خلفيات و غايات، و الدليل علاش سوريا ما تخلّيش جماعة حماس يرميوا صواريخ على إسرائيل من أرضها، و علاش حزب الله ما يضربش إسرائيل بصواريخو؟؟؟ علاش هوما يتشبثوا بالإتفاقيات الدولية و يطالبوا مصر باش تخالف الإتفاقيات الدولية وتحل معبر رفح؟
أيا يزّيني و يزّيكم ما ناش ناقصين وجيعة راس،

Hnani Politics

إلّى يحب يعيش مرتاح في هالدنيا لازم يهني على روحو… تاريخنا الماضي والحاضر و يا من دراك، معبي بالحكايات متاع شعوب و حكام هنات على رواحها… و الواحد لازم يتعلّم من التاريخ ، ويعرف يصون هناه … لكن المشكلة كونا ماناش قارين و عارفين تاريخنا كيف ما يلزم، هذاكا علاش تلقي شويا عرب قباح حاشاكم وعينهم صحيحة، ما ينجّموش يهنيوا على رواحهم… ما يكسبوا من العروبة كان الإسم… اتقول عليهم جايين من كوكب آخر، ولّا عندهم عرق يهودي ولّا مسيحي اللطف علينا و عليكم…
القباح هاذم ولّى عينيهم صحيحة، لاهم امهنّين رواحهم ولاهم امخلّين أمّاليهم العرب متهنين… يقول الواحد يمكّن فيهم إسرائيل ولّا بوش ولّا الحكام العرب تاكللهم قلوبهم ، فمّاش ما يرجعوا لأصلهم و عروبتهم… توا بالله عاد شبيه كان فكّولنا بلاد، والعباد كثرت ، وحبوا ينقصوا منهم شويا باش ينجموا يعيشوا مرتاحين؟ ولّا جابوا جيشهم باش يخدم في بلادنا و ينقّص شويا من البطالة في بلاهم؟ أشنيا المشكلة؟ مانا انهنيو على رواحنا و نسكتو عليهم… و بقدرة الإلاه لازم يجي نهار ويشمشيو يروحوا لبلدانهم … شويا صبر وكرم و حسن الظيافة ، وكل شيء يتعدى سلامات.. و الضيف صيف كيف مانقولوا…علاش لازم القباحة و قلّة الحياء والضرب بالكرتوش والسبابط؟؟
يا حسرة يا زمان على الأخلاق و العروبة، يا حسرة على الكرم والشهامة… الدم العربي اتخلّط وفسد يا جماعة، و ما بقينا نلقاوه كان في شويا أحصنا و القادة متاع العرب… الواحد يحمد ربي إلّى لا يحمد على مكروه سواه، أنو الحكام العرب ،و المسؤولين إلّى معاهم ، مازالوا يبَيْظولنا في وجوهنا و امهنّين رواحهم والأمّة العربية والإسلامية قاطبة مع الغرب و الضيوف… الحمد لله إلّى مازالوا يحشمو و يجعرو و ما يهزوش عينيهم في الخواجات…و أخلاقهم و دمهم الأصيل لا يفسدهم ولا يحرقهم لا قنابل ولا مبيدات إلّى تهبط عليهم بردا وسلام …
اتصورو كان ربي يبلينا بحكام ماهمش مؤمنين إيمان صحيح، بأن كل شيء صاير فينا راهو ربي هو إلّى مقدرلنا بيه؟؟؟ وكل ما تصيبنا كارثة ما يصبروش عليها، و يسخن دمهم كيف جماعة العين الصحيحة، ويبداو يجريو و يجريو باش يبعدو الكارثة و يفكولنا حقنا؟؟؟ ماهو عاد ، انقولو ، و على الأصالة والعروبة وأخلاقها و قيمها و الدنيا السلام..
اللهم أحفظ حكامنا و تابعيهم، اللهم أحفظهم من القباحة والعين الصحيحة،و تلوّث دمهم العربي الأصيل، اللهم ثبّت إيمانهم لحماية سلالتهم و ثرواتهم و أرزاقهم وما ملكت أيديهم ، اللهم كثّر لهم في الضيوف و قلّل لهم في الرعية، إنّهم بشر البليّة.

Hnani 7KAYIT HNANI

للتاريخ و باش نموت و ضميري مرتاح مع القضية الفلسطينية و أهالي غزّة في المجزرة إلّى عملتهالهم إسرائيل و قتلت 200 شهيد و جرحت فوق 500 شخص.. وربحا للوقت، نسبق اجتماع الجامعة العربية إلّى اتحبّلها وقت لشريان تساكر الطيارة و تصريف الفلوس متاع المهمّة، نقول باسمها الكلام إلّى باش اتقولو بعد اجتماعها كان اجتمعت: اندّد و نشجب و نستنكر.. اندّد و نشجب و نستنكر… اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر،اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر، اندّد و نشجب و نستنكر

Hnani 7KAYIT HNANI

أمكم سيسي هزّت مصلحتها، لكفتتها في كلسيطة قديمة و مشات خباتها وراء جرّة الزيت…. الباب يدق، تمشي اتحل ، تلقى الحاج كلوف و هنونة وهناني قدام باب الدار… حلّت ربطة التعصفيرة و عاودت كبستها و قالتلهم: ع السلامة بيكمش يا جماعة؟
الحاج كلوف متقدّم كيف العادة، قاللها: ان شاء الله تكون لاباس يا سيسي، شبيك ماكش تكنس تكنس؟
ما عدتش باش نكنس، نكنس يا جماعة ، كان على الفليّس، البارح قالولي ماعادش فمّا فلوس في العالم الكل… العالم بكلوا ولّا تر فر…
قامت هناني قالتلها: أشكون قالك هالحكاية يا سيسي أختي؟ ربطنا راهو في الحكاية متاع الفلوس، ماهوش تابع العالم… و فليساتنا مازالت موجودة في الحفظ و الأمان… و بقدرة الإلاه لازم ربي ينوب عليك و تلقي فليّس آخر…
سيسي دخلتهم للدار، قعدوا في البيت إلّى فيها الطاقة هنونة وهناني والحاج كلوف للدار… الحاج غزر لسيسي و قاللها: شكون قالك هالحكاية يا سيسي؟ هاو في الجرايد والتلافز قالولنا ، ربطنا لاباس ، و يا جبل ماتهزّك ريح…
قالت سيسي: أنا يا حاج يا خويا ما نعرف شيء، أولاد الحومة هوما إلّى جاووني يتجاراو وانا نكنس نكنس، وقالولي الحكاية…
قالتلها هناني: شكونهم يا سيسي؟ ولاد شكون؟ في بالي أولاد الحومة مافيهم حد تهمو حكاية الفلسة متاع العالم….
هنونة لازم تتكلّم وتقول حويجة، ماهو ما يجيش ما تدخلش في نقاش فيه سيسي… قالت: في بالي وليدات زنقتنا ما يعرفوا كان الكورة و الغنيات متاع الكورة…
قالتلها سيسي: هذوكا يا هنونة أختي إلّى جاووني ، بعد الطرح متاع الكورة، جاو يلوجوا على الحجر ما لقاوش…
الحاج كلوف ضحك و قاللها: الله يهديك يا سيسي، ما خليتلهمش حتا حجيرة باش يظربوا بيها … الزنقة نظفتها من الحجر الصغير و الكبير…
قامت هناني قالت: ربي يخليك لينا يا سيسي أختي كيف نحّيت الحجر من الزنقة، وربي يجازيك و يطيحك بفرنك ولا زوز فرك… و الله عيب ضرب الضيوف بالحجر… توا هذي من أخلاقنا يا جماعة؟ رانا العرب معروفين من أوّل الدنيا بالكرم و حسن الضيافة…
قالت هنونة: مالا لا ، يا هناني أختي… يقولوا ناس بكري، ما يكبر في دارك كان القرع…
الحاج جبّد شليغماتو و مسّح عليهم، وتمحمح و قاللهم: أيا انخلّيكم على خير و خلّيني نمشي لهاك البيبلينات، عندي لعبة طلعت جديدة انحب نلعبها…
غزرتلو هنونة و قالتلو: يا حاج راك كبرت وهترت، شنيا اللعبة، تبداش لعبة العقفة؟
ضحك الحاج وقاللها: لا يا هنونة الغالية، لعبة ضرب بوش بالسباط… والله الراجل طلع يفنتي بالقدا، انقمّر انقمّر و ما جبت السباط عليه كان أربعة مرات….
قالت هناني: منين باش انردّوها توا يا حاج؟ الحمد لله ضرب وليداتنا بالحجر ما يشوفو حد… ما تفضحنا في التلافز متاع العالم الكل،كان بجماعة الحجر متاع فلسطين وجماعة السباط؟ ما عندهمش أخلاق الضيافة، يا حاج يا خويا…في بقعت ما يعطيوا للضيف كارو و يعملولو حفلة فيها زمار و طبال و راقصة ، يضربوه بالسباط؟ يخّى هو المغبون بوش قدّاش باش يقعد بحذاهم؟ ماهو سويعتين من زمان يصحّح في وريقة، و يقولوللهم كليمتين في العضم ويمشي على روحو…. أحنا يا حاج رانا ناس عاقلين و متخلقين، و متربين من أوّل الدنيا… و هاك اتشوف تربيتنا خلات وليداتنا متاع الجرايد في القمّة ، الجرايد والتلافز متاع العالم، يا حاج خويا يخطفو فيهم خطفان، و الله ما حقوش الزيدي يعمل لأولاد كارو العار ويخلّى فضيحتنا بجلاجل…
الحاج كان زاهي، كلام هناني نرفزو، هز عكازو للسماء و قال: العزوزة هاززها الواد و هي تقول العام صابة … زايد مع البلادة الذهنية… توا يا رسول الله، الأمريكان في نهارتها عملوا اللعبة متاع ضرب بوش بالسباط و عطاووها للعالم الكل باش كل واحد يعطيه ضريبات فين يلقي الوقت… و قالولكم بالكلام والتصوير و اللعب يا عرب راهي بومتنا كان جات فيها خير رانا ما خلّفناهاش في المصيد… وانتوما مازلتو تحكيوا على كرم الضيافة؟؟؟
سيسي ماهي فاهمة شيء، كبست تعصفيرتها و قالت: يا حاج برحمت والديك أشنوا معناها بلادة ذهنية…
الحاج خرج يجري و يتمتم: تستيكة بقري

Hnani 7KAYIT HNANI

التآخي و التآزر، كلام ما أحلاش منو، كلام متاع ناس يحبوا الخير لغيرهم كيف ما يحبوه لنفسهم… معناه راهو التوانسة الكل خوات في وقت الشدّة تلقاهم يد وحدة ، القوي مع الضعيف، الصحيح مع المريض، الغني مع الفقير، والعاقل مع المهبول، و لّى عندو مع إلّى ما عندوش… هذا آش نفهم من التآخي و التآزر…
لكن الواقع آش يقول؟ هل أن التوانسة بالفعل مغروسة فيهم قيم التآخي و التآزر؟ هل أن مجرّد تقديم صدقة وانت عامللها حساب من الثواب إلّى باش يرجلك من المسؤولين ، يمكن نعتبرها عمل تآخي و تآزري؟؟؟؟
هل أنّ تقديم تقديم شيء باليد اليمنى و أخذو باليد اليسرى، مثل أصحاب المشاريع إلّى يعطيوا بعض النقود لصندوق التضامن، ويسترجعوها من الضرايب، معناه عمل إيخاء و تآزر؟
هل أنها ظاهرة ، المسؤول التونسي إلّى يوصل يهدّد الموظّف و العامل البسيط، باش يعطي بعض الدنانير في يوم التضامن، و هو بيدو تلقاه يتغصور وماذا بيه ما يعطيش، تدل على روح التآخي والتآزر عند التونسي؟؟؟
هل أن عقلية الجهويات الّى قاعدة تكبر، بحكم الفرق الكبير في مستوي العيش ،تنجّم تتوجد معاها عقلية التآخي والتآزر؟؟؟؟ هل فاقد الشيء يمكن باش يعطيه؟
هل أن توزيع الإعانات و القروض و الإمتيازات، بمقياس الجهوية والإنتماء لحزب معيّن،و إلّا لجهة معينة في حزب، يدل على وجود قيم التآزر و التآخي؟؟؟
حسب رايي، التونسي مازال ما وصلش لمرحلة التسامح حتا مع روحو… التونسي مازال ما يعرفش كيفاش يعيش متوازن و متصالح مع روحو ومع الآخرين، لهذا روح التآخي و التآزر مازالت بعيدة عليه، و الخطر كيف يكذب على روحو ويصدّق الكذبة…
اللهم مفهومهم للتآخي ماخذينو من المثل الشعبي: كان الخو ينفع خوه ما يبكي حد على بوه
ولا: خويا من الكلالة، في الربح مقدّم ، وفي الخسارة لالا
و مفهوم التآزر ماخذينو من المثل: تكثر العمومة في السنين المشومة
إذا نصحك العربي راهي شطر النصيحة ليه

Hnani 7KAYIT HNANI

فمّا واحد مثقف من المثقفين الكبار، عايش فوق النصف قرن عويزب، كان كل حديثو على النساء سلبي، النساء الكل بيهم و عليهم… النساء إلّى يخدموا معاه، نساء صحابو… النساء إلّى في الشارع، بكلهم ما يصلحوش ، و بما أنو لبلب في الكلام والإقناع أثّر في برشا صحاب و رد حياتهم مع زوجاتهم جحيم… و من كثر ما كان يسب في النساء و الحياة الزوجية ، و التباهي بحريتو في السهر و العلاقات، فمّا شكون من أصدقائه المعرسين، عملوا كل ما في جهدهم باش يعيشوا مثلو ، وأكثر حرية منو ، باش يبرهنوا للسيد و أمثالو، على مقدرتهم على العيش بحرية ولّى الزواج ما ينجّمش يحرمهم منها… الصحاب هاذم ، دخلوا في طريق الحرية من الباب الواسع، و كيف مانقولوا للتحدي.. ولّاو هوما بيدهم مثال و عندهم باع وذراع في ميدان الحرية… و حياتهم مع نساهم و أبنائهم ،ولّات حياة تعيسة، ديارهم جحيم بالنسبة ليهم لأنها تمثّل سجن و حاجز بينهم و بين الحرية…كل نهار نهارين، يشريوا العركة من غير سبب… و وصل البعض طلّق و البعض الآخر بقاو معرّسين لكنهم موش موجودين لا كأزواج ولا كآباء، لأن الماديات ماعادتش اتززيهم حتا لحياتهم الخاصة…
امشي يا زمان ويجا يا زمان، السيد هذا عرّس، فمّا ناس عاقلة و ما مشاتش بهواه، و كانت تتقلّق من كلامو كيف كان يحكي على النساء، لأنهم يغيرو على نساهم، و يفهموا عقليتو المعقدة من النساء.. عاد باش يرجعولوا شويا من الشيء إلّى زرعو، ولّات اتجيه و بعد ماتهنيه على العرس، تجبد تحكي على النساء بنفس العبارات إلّى كان يحكي بيها…. السيد ولّا هو إلّى يتغصور، و وجهو يحمار ويزراق، و ماعادش يحب يقعد لا معاهم ولا مع خريجي المدرسة متاعو… و حتا زيارة أي شخص من نساء ولا رجال ليه في دارو ممنوعة بينما هو كان ومازال يدخل لديار أصدقائه و يبات و يصبح ، كيف مانقولوا… ماشي في بالو يفهم الألاعيب الكل، وماهوش باش يخلّى حتا حد ينغّص عليه حياتو…و يلعب الدور إلّى لعبو معاهم..
مرتو حبلت، فرحان مزهزق بالفرحة، بعد أشهر، عرضتو زوجة واحد من أعز صحابو، ولّى هي إحدى الضحايا… سألتو على حالو واحوالو ، وأحوال مرتو: جاوبها و قاللها: المرا غضبانة في دار بوها عندها أربعة أشهر… المرا قالتلو: علاش ؟ قاللها :عملتلها عركة باش نخرج من الدار و نقعد وحدي في ستوديو العزوبية، عندي خدمة انكمّلها ومن بعد توا نشريلها حاجة وانرضيها…
المرا ضحكت وقالتلو: السياسة هذه ماهياش غريبة عليا وانت تعرف، و رد بالك راهم موش النساء الكل تنجّم تتحمّلها… و كيف ماهو متوقّع ، المرا ولدت في دار بوها، و الأكيد ماهياش باش اتكون كيف مرت صاحبو… و السيد باش يحصد إلّى زرعو..

Hnani 7KAYIT HNANI

السباط ،الوقت الحاضر موجود عند الكونغرس الأمريكي ،و من بعد باش يهزّوه للأمم المتحدة ، كدليل قاطع على وجود أسلحة الدمار الشامل في العراق… اتصالات كبيرة صايرة في الوقت الحاضر بين بوش والحكومة العراقية لإرسال الكلاسط متاع الصحافي الزيدي، لأن بوش في حاجة لمخزون أكبر من رائحة الكلاسط كدليل قاطع لوجود السلاح الكيمياوي في العراق ، و لكي يقدر يحط الدليل في كل ملف يقدمو للجهات الدولية و البلدان العربية الحليفة…
الناس الكل بهتت من سرعة بوش من معرفة قياس السباط إلّى رماه عليه الصحافي العراقي. ناس يقولوا بوش طلع أصلوا سبابطي، وناس يقولوا أصلوا ملّاخ سبابط…و زيد فوق هذا الصحافة الأمريكية اتفاجئت بالرفلاكس متاع بوش ،باش ما جات عليه حتا فردة سباط..
أنا بربشت و عرفت الحكاية، لقيت إلّى بوش أصلو لاهو سبابطي ولا هو ملّاخ سبابط … ولاهي حكاية سوبلاس و لا رفلاكس… بوش يا جماعة طبّس المرّة الأولى باش يثبّت من قياس السباط، و ما يتبدّلش بسباط آخر… و المرّة الثانية طبّس باش يتأكّد من الريحة إلّى شمها في الفردة لولا…
الريحة متاع السباط يا جماعة ، هي نفس الريحة إلّى شمها في دوسيات جماعة التفتيش على السلاح الكيمياوي في العراق… كان كل ما جماعة التفتيش تمشي للعراق و ترجعلوا بملف، اتجيبلو فيه ريحة الكيمياوي… الراجل من كثرة ما شمها في الملفات ولّا خبير فيها… أنا نتوقّع بعد ما يخرج من الرئاسة باش نلقاووه يترئس لجنة خبراء في السلاح الكيميائي…

Hnani 7KAYIT HNANI

قالك مجلس الأمة فيه جماعة خونة يا حاج، بيوعة كيف مانقولوا، الله أعلم كيفاش دخلوا و وصلوا للمجلس متاعنا؟
كيفاش طلّعتهم يا هناني يا ذكية؟ ما تقلّيش ولّيت تقري في الجرايد؟
وراسك يا حاج لا كنت قاصدة نقري الجرايد، سشيات الزبلة حاشاك وفاو عليا، مدّيت جريدة قلت نحطها في السطل ، في بقعة السشي، يخّى عيني طاحت على كلمة مجلس لمّة ، و من غير ما نشعر قصّيت المقال و الباقي حطيتو في البوبالة…
الحاج ساعات كيف هناني تبدي تحكي، هو يكون سارح… عاد غزرلها و قاللها:
و الله يا هناني شيء يحيّر، توا حكاية التنبري متاع السفر علاش ما تنحّاش لتوا؟ في بالي عملوه لوقت معيّن و باش ينحيوه… بالله توا على رخص تساكر الطيارة ولّا على غنانا باش كل حركة بحسنة؟
هناني تفجعت و قالت للحاج: يا حاج، برحمة والديك ما عادش تجبد هالحكاية، راك خويا وانخاف عليك ليسمعوك جماعة العمدة واترصّيلك متهوم …
علاش باش يتهموني يا هناني؟ و فاش باش يتهموني؟ ما عنديش الحق كيف كل مرابط في الربط باش انقول يا ولادي ارفقوا بينا؟
يا حاج راهو كلامك كبير و موش باهي، راك قاعد اتقول في نفس الكلام إلّى قالو العميل إلّى يخدم في مجلس الأمّة والصحافة كاتبة عليه…
الله يهديك يا هناني، الجرايد خربتلك مخّك ، وانت ماكش ناقصة، والله فكّرتني في وقت الجامعة يا هناني… مالا أنا عميل يا هناني؟ تنجّمش اتقلي لشكون ؟
الله أعلم بيك يا حاج؟ روسيا ماهي قالوا اتكسرت، و أمريكا محسوبة أمنا و أم الدنيا الكل..
بالله يا حاج قلّي: اتصوّر التنبري يتنحى؟ كيفاش الربط متاعنا باش يعيش و يتطوّر و يكون في المقدمة؟ والله المدّة لخرى تفرّجت على مسلسل تركي عنوانو: لا أرض و لا وطن، حمّملي قلبي..
يا هناني راني نبّهت عليك من هاك العام، خلّي مخّك رايض وكمّل أياماتك بالذكرايات الباهية ، وابعد على الأخبار و الجرايد…
يا حاج يا خويا، راني مرابطة كيف المرابطين الكل، ولّى صاير في الربط يهمني… اتصوّرني عايشة كيف زينب إلّى في مسلسل لا أرض ولا وطن، كيف يتنحا التنبري و يضيع الربط متاعنا ؟؟؟
معناه كيف واحد يطلب الرفق بعباد الربط ، يتسمى خاين؟ و الربط يضيع ؟؟ توا هذا كلام ناس عاقلة يا هناني يا مرابطة؟؟؟
يا حاج يا خويا، يعيشك و يخلّيلك هنونة، الرفق راهو ماهو مطلوب كان للحيوانات… ما فمّاش حاجة اسمها الرفق بالعباد… كان تلوّج على الرفق ، مازالت شويا في الخبز المِرْفِقْ ، و الخضرة الِمرْفْقة في مرشي الهجاجل… وكان حاشتك بالرفق في حاجة أخري ، أطلب الرفق من عند ربي، وربي يرفق بينا الكل يا حاج…
هنونة السكّر طلع و زايد الحديث معاك، و ربي يرفق بمخيخك وانا في صحيحتي باش نقعد نطلب في الرفق من كل واحد يتحكّم في هالربط… و خلّيهم يقولوا عليا مانيش مرابط…

Hnani 7KAYIT HNANI

الوالد مريض، طاح اتشعرت ساقو، راقد في المستشفي ربي يشفيه.. اليوم ما مشيتش طليت عليه لظروف خاصة، لكني اسألت عليه خويا بالتليفون … ماني قلتلكم الوالد مغروم بالجزيرة و أخبار العراق و فلسطين .. اليوم قلق من السبيطار و يحب يروّح، حس روحو عند مونك متاع أخبار… ما يحبّش اتفوتو لا كبيرة ولا صغيرة، وزيد يتبّع في الإتفاقية متاع العراق و أمريكا.. الإتفاقية إلّى عندها زوز أسامي: الأمريكان امسمّينها إتفاقية بقاء الجنود في العراق… و العراقيين مسمّينها إتفاقية خروج الجنود من العراق… الواحد ماهوش فاهم كان العنوان موش كيف كيف ، مالا المحتوي زعما كيفاش؟ يكونش كل واحد عندو شيء مكتوب؟؟ المهم، نرجع لموضوعي و هو كيفاش خويا عمل باش يريّض الوالد و يعطيه دوزة متاع أخبار تهدّيه نهيّر آخر؟ جبدلو حكاية الصحافي العراقي كيفاش ضرب بوش بسباطو في ندوة صحفية في العراق.. الوالد سمع الخبر و وجهو جري فيه الدم و عينيه بعد ما كانت شبه مغمضة اتحلّت… خويا شاف فرحة الوالد، زادو دوزة أخري و قالو: والصحافي سب بوش و قالو يا كلب حاشاكم… الوالد ولّا يتحرّك و كاينو يحب يقوم… خويا قال نزيدو شويا: قالو راهو بوش يخبي في راسو كيف الفار باش السباط ما يجيش عليه… الوالد زاد هز روحو وحرّك سوقو من غير لا يقول آي ساقي توجع فيا… خويا خاف عليه ليقوم وساقو تصيرلها حاجة و اترصيلو في مشكلة من الدوزة الكبيرة متاع الأخبار إلّى عطاهالو… فكّر و قالو: باب أرجع أرقد بالصواب، و خليني انروّح باش انشوف الخبار وانجيبلك أخبار الصحافي العراقي…
الوالد شد بلاصتو وهو شايخ بالدوزة متاع الأخبار… لا آي ساقي ولا آي رجلي و يتمتم : يعطيه الصحة هالصحافي ، كان جاو عند العرب كعيبات منو رانا ماناش في هالحالة ، والله فرهدني في مرضتي، يرحم والدين والديه.

Hnani Uncategorized