Hnani and the Family

توا بالله أحنا مازلنا نؤمنوا بحكاية كلمة؟ فمّاش واحد مازالت عندو كلمة؟؟ ولا يتعامل ب كلمة .. تهو الواحد يشد في القانون و يجعلو يمنع … في وقت توا إلّى يتعامل بلـ كلمة مشات فيه و في الحشاشة… قالك إلّى عطى كلمتو عطي رقبتو.. صحيح المعني متاع عطيان الرقبة متاع بكري موش عطيان الرقبة متاع توا… لكن في الحالتين الرقبة مهددة… ال كلمة راهي ماهياش ساهلة … أصعب من الجملة الفعلية و الجملة الإسمية..
الواحد كان راد عليه ربي واتأزّم على خاطر ما ينجّمش يقول كلمة ولا يسمع كلمة ولا حاير يعبّر ولّا ما يعبّرش..ما عليه كان يمشي يعمل حصص تيرابي عند طبيب نفساني توا يعاونو على السكات و لا عاد يستحق لا للتعبير ولا حتى لـ كلمة…
شفتوش حيوان يقول كلمة؟ هوكا عايشين لاباس عليهم في الطبيعة و المحميات.. بقانونهم متاع الغابة القوي ياكل الضعيف ويا حيوان ما كان باس …
حيوان واحد خلقو ربي ينجّم يتكلّم هو البغاء … لكن ما ينطق كان بالكلام إلّى يعلمهولو مولاه…. يعاودو بالحرف من غير لا زيادة ولا نقصان و من غير ما يخرج من جنس الحيوان…
هيا انخليكم توا ماشية نطيب فطوري شويا عجّة بمخ بقري ، انودكم ولا انشهيكم.

Hnani 7KAYIT HNANI

اسرائيل تهدّد بفسخ الصفقات التجارية بينها و بين تركيا. على خاطر تركيا قالت لا للحرب و قتل الأبرياء. زعما مناش مصنوعين الإسرائيليين ؟ علاش لا يفلتوا لا كبيرة ولا صغيرة اتمس مصالحهم و أمنهم ؟ علاش السفارة الفنزولية في فرنسا تهجم عليها اليهود و لا واحد اتكلّم عليها و لا الأمن الفرنسي حماها كيف ما نحميوا أحنا العرب السفارات الأمريكية و الإسرائيلية في بلدانا؟ علاش كيف يقولوا كلمة ياخذها العالم مأخذ الجد، موش كيف ما يتكلموا العرب لا واحد يعلّق حتى على كلامهم؟
علاش الذل هذا الكل متاع حكامنا إلّى طيحولنا من قيمتنا و كرامتنا مع العالم؟ منين باش يتطور العربي و يولّي يبتكر و يخلق و هو حتى باش يفكّر ولّا يعبّر ممنوع عليه…كيفاش باش العالم يعطي قيمة لإنسان عربي و هو يعرف إلّى العربي حتى مع حاكمو و في بلادو لا عندو قيمة ولا قدر ؟
العبودية و بيع العبيد اتنحي في صيغتو القديمة، لكن الصيغة الجديدة للعبودية توجدت بالقوانين العالمية الجديدة و العبيد هم العرب و في مقدمتهم الحكام إلّى مواقفهم ما تدل كان على أخلاق العبودية.
أنا راني كتبت باش انفرّغ قلبي، خاصة بعد ما جاني تعليق من شخص ظاهر فيه من الخليج ولا مصر و قالى فيه إلّى أنا قاعدة في داري و انبث في الفتنة بين العرب و عاتبني كيفاش نحكي على المصريين و حسني مبارك.. هو كثر الهم يضحّك، اتصوروني انبث في الفتنة بين العرب الأبرياء من الفتنة و المتماسكين و المتوحدين و لّى عندهم كرامة وشهامة وعزّة نفس!!!!!!!!

Hnani Politics

إسرائيل دولة إرهابية و يلزم حكومتها تتحاكم باعتبارهم مجرمي حرب إبادة، هذا باش انقولو كل ما نجي نحكي على القضية الفلسطينة..
لكن كيف انجي نحكي على العرب انقول دماء مدنيين غزة في رقبتكم
بالله يرحم والديكم كيفاش اتحبوها اتكون حالة العرب كيف يكون حسني الموش مبارك يصول و يجول في تقرير مصيرها؟ كيفاش باش اتكون وقت مصر تحكم في الجامعة العربية و زيد توا ماخذة رئاسة الإتحاد الأورومتوسطي مع العنصري و المعقّد رئيس فرانسا نيكولا سركوزي؟
توا يا سيدي باش ما تخمّوش برشا ، حكاية فلسطين ما عادتش عند الخرمة العربية على خاطرها خرجت من يدين جماعة القومية العربية والأمة العربية و صوت عربي واحد ، و دخلت في العولمة و بالتالي ولات قضية تهم الإتحاد الأورومتوسطي و الرئيسان مبارك إلّى خرّف و سركوزي المعقّد ولّى كان جاء فيه خير راهي مرتو ما طلقتوش وهو رئيس،
نعرف باش ما تفهموش حاجات كيف هذه، أمور شخصية لكن اتدل على برشا حاجات و هذاكا علاش تلقي البلدان إلّى تفهمها يبربشوا على الأمور الشخصية لكل مترشح باش يحكمهم.
عاد هذاكا علاش سركوزي هازز روحو و مشي يحكي مع مبارك باش يحلوا القضية الفلسطينية، مالا شنوا؟ اسرائيل و غزة موجودين على البحر الأبيض المتوسط و مشكلتهم مشكلة أورومتوسطية يرحم والديكم… و مبارك قاللكم اليوم ما فماش قمة عربية لوكان اتبوسوا عينكم و جماعة غزة والضفة يموتوا الكل… الراجل ما ينجّمش يعالج القضية مع زوز إتحادات، يتمهمش، و زيد لقاها أسهل كيف يحطها مشكلة الإتحاد الأورومتوسطي و يحلها مع سركوزي . لا عرب ولا تكسير راس، الراجل يحب يتعامل مع الناس إلّى خير منو، يغزر الفوق ما يغزرش لوطة، رئيس طموح ، مازال ينجم يعيش 20 سنة أخري و يلزمو ا يغزر لبعيد، العرب ما يساعدوش و خاصة توا البرميل متاع النفط بزوز فرنك، و مدّة أخري الناس الكل تولّى عندها الطاقة البديلة و النفط حتى بلاش ما يشريوش.

Hnani Uncategorized

آخر الأخبار تقول أن محمود عباس تنتهي ولاية رئاسته اليوم مع منتصف الليل
لذا فلن يكون سوي مواطن فلسطيني عادي
زعما في الحالة هذه إذا صارت انتخابات، شكون باش يربح؟ فتح ولا حماس؟
سؤال موش وقتو في الحقيقة لكن مادام الفلسطينيين جبدوه علاش ما نجبدوش أنا .

Hnani Politics

أول خطوة اسرائيلية لبحث خطة حسني مبارك، تبدأ اليوم بزيارة وفد اسرائيلي لمصر و الإلتقاء برئيس المخابرات المصرية. هل أن خطة مبارك هي خطة استخبراتية بالأساس؟ هل يزور الوفد الإسرائيلي مصر للوقوف على أهمية المعلومات التي سوف تقدّمهامخابرات مصر للقضاء على المقاومة، ومنها تحدد موقفها من قبول الخطة أو رفضها؟
في نفس الوقت كندوليزا رايس سوف تستقبل المبعوثين العرب ، ما عدى مبعوث قطر و عمر موسي ؟ لماذا استثناء قطر و رئيس الجامعة العربية(مصر) مع العلم أن قطر و مصر لهما أكبر علاقات مع اسرائيل.
مسكينة فلسطين و هناني البربرية، إلّى شدوهم العرب و بدعوا بحالهم. بورقيبة الله يرحمو قال للفلسطينيين اتلهاو بقضيتكم و ردوا بالكم اتسيبوها في يدين العرب… هاو النتيجة، ولّا مازالت ماهياش باينة؟
الجدود العرب و المسلمين عطاو فلسطين لليهود، والملك فيصل هو من عمل المعاهدة مع الأنقليز و توا الأحفاد طلعوا ذكيين و وطنيين كيف جدودهم

Hnani Politics

اليوم حسنين هيكل في حوار مع الجزيرة، قال إلّى الرئيس الفرنسي سركوزي قال لأولميرت أن الرئيس حسني مبارك قالو إلّى هو ما يحبّش حماس تربح الحرب مع اسلاائيل، والخبر نزل في وسائل الإعلام الإسرائيلية و حسني مبارك ما كذبش الخبر.
و عبّر عن قهره و امتعاضه من موقف بلادو، وقال: لم يستطع إلى حد الساعة فهم موقف مصر من تسكير معبر رفح، و اتمنْيِك على تبريرات حسني مبارك فيما يخص عدم فتح رفح بحجة اتفاقيات دولية، وكان يفتحوا المعبر تسقط صفة المحتل على اسرائيل.
و يعتبر حسنين هيكل أن مبارك قد أهان تاريخ مصر و مستقبل علاقاتها و مصداقيتها عند البلدان العربية والعالم، وأن مواقفو هي مواقف انتهازية و مصالح ضيقة.
كما قال أن الحرب على غزّة مبرمجة من قبل و هذا الوقت هو أحسن توقيت لها باعتبار الفراغ السياسي الأمريكي، و أن الرئيس مبارك يتعامل مع حماس كأنه يتعامل مع المتطرفين الإسلاميين الموجودين في مصر، ثم تسائل عن امكانية مواصلة دور مصر في لعب دور الوسيط بين الأطراف الفلسطينية مادام رئيسها يعلن صراحة عدائه لطرف من الطرفين.
كما قال أن وضعية مصر و مصداقيتها عند الشارع العربي هو أسوء من وضعيتها في عهد السادات بعد ما قام بعملية السلام مع اسرائيل.

Hnani Uncategorized

توا نسمع في محلل لبناني يحكي على غباء السياسيون و المحللون العرب، عاد من بين ما قال : تركيا في حرب لبنان واسرائيل عام 2006 كانت إلى جانب اسرائيل في كل المجالات و خاصة العسكرية، ولم يكتب أي صحافي لبناني أي كلمة للتنديد بتركيا…اليوم تركيا مع الفلسطينيين، والعالم الكل يعرف…بعد خطاب أردوقان إلّى يندّد فيه بشدّة العدوان الإسرائيلي، وقال كونو يتكلّم بصفته تركي من سلالة الدولة العثمانية التي حمت اليهود في وقت مضى، خرج صحافي لبناني وكتب مقال طويل وعريض يندّد بتركيا سليلة الدولة العثمانية على أساس أنها دولة من سلالة الدولة العثمانية الإستعمارية، التي سبق وأن احتلّت لبنان .

حاجة أخري ، يظهرلي يا جماعة مصر باش تاخذ قطاع غزّة، الخطة متاعو مع سركوزي هي وضع غزّة تحت السيطرة و التسيير المصري، حسني مبارك طلع قوي قوي قوي، يا جماعة قوتو فاضت على مصر و باش توصل لغزّة

Hnani Politics

العالم خرج للشارع و صاح وبكي و بات في الشارع و لا أحد سمعو . حكومات عربية و منها الحكومة الفلسطينية، رفضت باش تنعقد القمّة العربية و مشات تجري لمجلس الأمن ماشي في بالها باش اتجيب الصيد من وذنو و باش أمريكا تسمعهم كيف يقولولها رانا معاك ضد حماس إلّى هي ارهابية، وهانا ما حليلنالهمش معبر رفح و ساعدناكم في مهمتكم، وتوا على خاطرنا قول لاسرائيل توقّف الحرب.
أنا إلّى يهبّلني هو البهامة متاع العرب كيف يتعاملوا مع غيرهم، ماهو يا بهايم يا بهالل، بينما كيف يبداوا مع بعضهم في قمّة كربيّة تلقاهم عينيهم بكلها شر، و شطرهم مخبي وجهو بهاك المحارم و يقحر من تحت لتحت و الغبث مالي عينيهم.
توا بالله مازالوا ما حشموش على رواحهم؟ خاصة محمود عباس و عمر موسي إلّى هو يمثّل مصر في الأوّل والآخر، مازالوا قاعدين و ماهم مروحين كان ما يجيبوا قرار وقف الحرب؟
تعرفوا؟ أنا متأكدة إلّى هوما باش يكونوا عند كلمتهم المرّة هذه، وماهم باش يروحوا كان كيف توفى الحرب، باش يركشوا في أمريكا بعاد على وجيعة الراس و ماهم باش يروحوا كان ما توفي الحرب بوش يقول لإسرائيل نشكركم على هدية توديعي و راني شبعت و رويت بالدم.
الشيء إلّى يهبّل الآخر هو تصريحات الظواهري، و الله تقول البهامة في الجينات متاعنا و متاع والدينا العرب. السيد يصرّخ و يقول إلّى اسرائيل عملت الحرب هذة كهدية لاستقبال أوباما. توا بالله هذا كلام؟ الراجل مازال لاهو يحكم ولا في يدو شيء و ملك المسلمين يجيبها و يجي.
حاصيلو زايد مع فنزولا إلى طردت سفير اسرائيل, وكيف ما قال العاهل الأردني : فمّا مؤامرة كبيرة تحاك ضد الفلسطينيين و الخوف الأكبر هو ما بعد الحرب. و بالطبيعة المؤامرة فيها أصحاب الكلمة في القضية الفلسطينية إلّى هوما مصر و السعودية مع محمود عباس
و ربي يقدّر الخير

Hnani 7KAYIT HNANI

اسرائل قالت منذ ساعات أنها تسمح بتوزيع المساعدات في قطاع غزّة. بعد هذا الخبر يجينا خبر يقول أن الحكومة المصرية أغلقت بصفة كاملة معبر رفح اثر الهجوم البري على غزّة…
باش نتأكّد من الخبر مشيت شفت قنات مصرية عندها شعار الأهرامات، لقيتها تعدّي في كلمة قديمة متاع الرئيس موش حسني و موش مبارك يقول فيها أنو حل المعبر للجرحي الفلسطينيين. رجعت لقنوات أخري نلقي الرئيس التركي يطلب من مصر باش اتحل معبر رفح ، و مصر تغلق المعبر بصفة نهائية.
منين باش انشدوها مصر؟ أيام الحصار و في بداية الحرب ترفض باش اتحل معبر رفح لإلتزامها بالإتفاقيات الدولية و الصحيح مع إسرائيل، و من بعد حلتو قطرة قطرة. اليوم بعد ما وافقوا أسيادها بتوزيع المعونات اتسكرو بصفة نهائية.
يا ولادي فسرولي اللغز راهو راسي ما عادش فيه .
موش عندو الحق الحبيب بورقيبة الله يرحمو كيف قال عام 1965 يا فلسطينيين ردو بالكم تخليو القضية متاعكم في يدين العرب، و تردو قضيتكم قضية عربية؟

Hnani Politics