أيا سيدي باش ما تبداوش غافلين على الشيء إلّى قاعد يصير في تونس من جراء تأثير النهضة الحضارية إلّى تشهدها البلاد العربية .. نهار الإثنين سمعت برنامج في إذاعة جوهرة يحكي في موضوع الخيانة و الغدر بأنواعو… أيا جات طفلة عمرها 16 عام و بدات تحكي كيفاش راجلها غدر بيها و قالت إلّى هي عرست كيف كان عمرها 14 عام بطفل عمرو 17 و زواجهم كان زواج عرفي ، كتبوا ورقة وبحظور زوز شهود
دارهم ما فيبالهمش، كيف حبلت هزّت روحها و مشات لدار أخت الطفل ( بالطبيعة الأخت خايفة على خوها من الحبس) و عاشت فيها حتا ولدت، و بعد ما ولدت الطفل هرب و هي قعدت حسب ما قالت من دار لدار في ديار صحابها( الله أعلم شنوا نوع الصحبة) و توا تحب السخطة راجلها يرجعلها بعد ما مات صغيرها
المذيعة ما هياش امصدقة إلّى تسمع فيه قالتلها و كيفاش مات الصغير؟
جاوبتني بدم بارد وبكل وقاحة : خليتو بحذا صاحبتي يخّي مات
عاودت قالتلها يا بنتي رانا ما عندناش زواج عرفي في بلادنا
جاوبتها: علاش؟ كتبنا ورقة و جبنا زوز شهود
ولّات المذيعة قالتلها، هاو عندنا نومرو التليفون متاعك ولازم نتصلوا بيك بعد البرنامج وانشوفوا معاك المشكلة
Hnani Uncategorized
البارح قريت تدوينة لولادة تحكي على عزيزتها أمي سعيدة الله يرحمها ، الحكاية عجبتني لأنها تحكي علي فترة من الزمن في النصف الأوّل من القرن الماضي، فين المرأة كانت حدها حد الكوجينة و الغسيل.. و رغم هاكا كانت اتنجّم اتقول لا للراجل إلّى كيف يغلط و يضربها من غدوة يطلب السماح بسنة ذهب و قصّة قماش …لأنو عاطيها قيمتها و يحترمها.
و زيد كيفاش كانت متمتعة بحياتها و بحب راجلها الله يرحمو و صرّتها إلّى كانت ديمة فيها الفلوس رغم أنها لا كانت تخدم ولا شيء.
بعد ما عملت كيف على الحكاية و قلت الله يرحمكم يا جدودنا كيف حرّرتونا و عطيتوا للمرا حقها و قيمتها رغم التخلّف إلّى كان عليه المجتمع في هاك الوقت.. و زيد رحّمت على محمد السنوسي و الشيخ سالم بن حميدة والطاهر الحداد و بورقيبة إلّى وصلوا المرا التونسية للوضعية إلّى يحسدوها عليها العرب الكل ولّى قاعدين النساء و الرجال العرب المتنورين يجاهدوا باش يوصلولها.
بعد ما سرحت وانا انرحّم على فلان وعلى والدين فلتان، يفيّقني من السرحة تعليق من واحد شباب يقول( ” الله يرحمها و بالحق الناس كانت باهية و عجبتني صفة جميلة و هي أنو كلات بونية و ما طيحتش كلمة راجلها و آني مانيش مع ضرب النسا و لكن نسا بكري كان معدنهم أصيل و ثمة عض النسا أتباع المسلسلات المصرية إلي يا دوبك تسمع مجرد كلمة من عند راجلها و تلقاها الشنطة و رايحة على دار أبوها. الله يرحمها أمي سعيدة”)
ما نكذبش عليكم قريت التعليق ثلاثة مرات باش نفهم كيفاش الوليّد هذا أهم حاجة عجبتو في الحكاية هي كيفاش أمي سعيدة كلات البونية و طاحت سنتها وهي ما طيحتش كلمة راجلها، و من بعد يقول إلّى هو ضد ضرب النسا..
و رغم هاكا ما وصلتش باش نفهم التناقض إلّى في تعليقو.
Hnani 7KAYIT HNANI, FEMME TUNISIENNES
هيا مرحبا يا جماعة، مانيش امسيبتكم، متخالفين متفاهمين ، اتصنفوني ماتصنفونيش ، أنا عزوزة و شدّيتكم، هاني باش مانقولش عزوزة و شدّت سارق..
عاد يا سيدي اليوم نهار كامل وانا مخّى يغلي ، مرّة نضحك ومرّة انحس بالفوارة و نتغصر، الحقيقة بعد ما قريت البارح على مرض الشيخوخة إلّي يتسمي الزهايمر، حالتي متاع اليوم ماتطمنّش و ربي يسترني و يستر جميع المومنين و حتى إلّى ماهمش مومنين، ماهو الرفق بيهم باهي..
عاد نرجع لموضوعنا إلّى خلاني اليوم اندور كيف الزربوط، و نستخايل في حاجات موش باهية بالكل.. الجماعة كتبت على التغيير الجديد إلّى صار في قانون إستعمال الفايس بوك، قالك يا سيدي الفايس بوك يقلّك ” اتحب تخرج مني ؟ برا أخرج ربي معاك ، لكن راهي المعلومات و التصيورات إلّى حطيتهم ولّاو متاعي و نتصرّف فيهم مدي الحياة”
عاد ما نكذبش عليكم ، ما خفتش على المعلومات ينفخها و يشرب ماها كيف ما قالي الحاج كلوف ما عندي ما حطيت فيه غير كلام عام ما فيه شيء ينفع، وإلا ساعات نبعث وردة ولّا قليّب و كيف كيف نقبل وريدة ولا قليّب، لكن المشكل في تصيوراتي و تصيورات عايلتي… عاد مخي نهار كامل يدي و يجيب و نتصوّر بعد ما نموت و يكبروا أحفادي ، و هوما متعدّين في شارع من الشوارع يلقاو تصويرة جدّتهم هناني في معلقة متاع إعلانات؟ و ربي يستر آش باش يكون موضوع الإعلان… و إلّا يشوفوا تصويرة جدّتهم في التلفزة مع جماعة يقولوا عليهم إرهابيين و شدوهم ما نعرف فين ؟ و إلّا في مجلّة من المجلات إلّى تحكي مثلا على موضوع الهبال حاشاكم و يحطوا تصويرتي على أساس عملوا معايا انترفيو في مستشفي من المستشفيات؟
الحقيقة مخي دخل بعضو وقلت إلّى هزتو ساقيه العصا ليه، ولّى قلّقتني أكثر هي حكاية قسمان الفلوس مع الفايس بوك كيف انولّى مشهورة… مالا!! قالك كيف تتشهر الفايس بوك عندو باي لازم ياخذو، ماهو هو إلّى شهرك !!! وانا قاعدة انحس في روحي بديت نتشهر و الشهرة على الأبواب ما نخبيش عليكم.
يا سيدي حكاية التصاور اتنجّم تتعدي و توا قبل مانموت نكتب وصيتي وانبّه على أحفادي باش يردوا بالهم وما يصدقوش إلّى ممكن يصير بتصاوري، لكن حكاية القسمة متاع فلوس الشهرة يستحيل انوافق عليها… أميمتكم الله أعلم بيا قدّاش انعدي وقت وانا من فايس بوك لفايس بوك نقري و نكتب وانحط في التصاور اتقول عليا نخدم عند سيادة الفايس بوك و بلاش حتى فرنك .. باش الفايس بوك يكبر و مولاه يربح الملياردوات.. وكيف نتشهر و اتجيني شويا فلوس يبغضني فيها و يحب يقسم معايا، توا يعجبكم هذا؟
و الله كان ما جيتش انحب الشهرة و حاشتي بفليسات الشهرة ، لا عدت انحل الفايس بوك ولّا مانسكروا ونخرج منو من الساعة هذه..
Hnani 7KAYIT HNANI
يقولوا إلّى الإعلام هو السلطة الرابعة .. تجي بعد السلط التشريعية و التنفيذية والقضائية .. على خاطرها عندها تأثير كبير على الشعب باعتبار دورها في نشر المعرفة و التوعية…
كان جريدة الصريح و مثيلاتها بودورو يمثلوا السلطة الرابعة في الربط؟ مالا شنوا أحوال السلط الثلاثة لخرى؟؟
سمعت في الفترة الماضية، إلّى جريدة الصريح عندها مشاكل مادية .. عاد يظهرلي هالمدّة لقات حل لمشاكلها و قاعدة اتخلّص في الدين متاعها، في ظل الحملة على الفايس بوك إلّى رجع بتدخّل رئيس الدولة و موش عاجب برشا ناس في الحكم و ما لقاوش كيفاش يعاودوا يسكروه..
و بالطبيعة أكثر واحد مؤهّل للأشياء هذه وللحملات هو س الوافي… رغم المسكين الله أعلم بيه قدّاش قعد يستدعى باش وصل للعدد الكبير متاع “الصحاب”في الفايس بوك متاعو و باش اترصيلو يقعد وحدو فيه…
السيد هذا ولّى كيفو عاملين حملة على الفايس بوك، كان جاو ناس نزهاء و مقتنعين بكلامهم و موش يلعبو على الحبال راهم ماعندهمش فايس بوك من أصلو، و حتا كان عملوه وقت ما كانوا غافلين راهم خرجوا منو…
تصرّفاتهم هذه تدل على ازدواجية في شخصيتهم، و ازدواجية شخصية أصدقائهم، إذ أنو موش معقول انسان طبيعي يكون عامل فايس بوك و إلّا صديق انسان عامل فايس بوك و يقول عليه راهو مكان متاع فساد…
عندي واحد معرفة حكالي حكاية على سمير الوافي صارت في مهرجان ربيع الفنون في القيروان… سمير الوافي هذا، حب يعمل حديث مع الفنانة إلهام شاهين .. السيدة رفضت باش تعمل معاه حديث، قرّق منا دار بيها منا ، قالتلو ألف وأعوذ بالله .. لأن جماعة المهرجان وقتها نبهوها منو.. و يحبوا يحافظوا على ماء الوجه مع الضيفة…في آخر مجهوداتو استعمل الخبث و طلب منها باش تتصوّر معاه فقط ، فوافقت…
من غدوة يهبط في جريدة الصريح حديث مطوّل قام بيه سمير الوافي مع إلهام شاهين و معاه التصوير كدليل قاطع… و زيد في الحديث المفبرك إلّى عملو جاء فيه أنو سألها علاش إلهام شاهين اتحب الرجال الكبار في السن؟ و بالطبيعة جاوب وحدو و قال إلّى قالو…
السيدة إلهام شاهين شافت الحوار في الجريدة و غضبت على جماعة المهرجان و ما ريضوها كان ما قالولها راهي جريدة الصريح ما عندها حتا مصداقية ومتاع أخبار كلها كذب و الناس الكل تعرف كذب و تلفيق السيد هذا…
هذا سمير الوافي و جريدة الصريح والسلطة الرابعة في الربط,إلّى “تقوم بدور تمثيل الأمم عند بعضها البعض” كيف ما يقولوا.. وقتها عاد يا فضيحتنا عند البراينية.
Hnani 7KAYIT HNANI
Un petit garçon demanda à sa mère :
- Pourquoi pleures-tu ?
- Parce que je suis une femme, lui répondit-elle.
- Je ne comprends pas, dit-il.
Sa mère le prit dans ses bras et lui dit :
- Et jamais tu ne comprendras.
Plus tard le petit garçon demanda à son père :
- Pourquoi maman pleure-t-elle ? Je ne comprends pas !
- Toutes les femmes pleurent sans raison, fut tout ce que son père put lui dire.
Devenu adulte, il demanda à Dieu :
- Seigneur, pourquoi les femmes pleurent-elles aussi facilement ?
Et Dieu répondit :
- Quand j’ai fait la femme, elle devait être spéciale.
J’ai fait ses épaules assez fortes pour porter le poids du monde ;
et assez douces pour être confortables.
Je lui ai donné la force de donner la vie,
et celle d’accepter le rejet qui vient souvent de ses enfants.
« Je lui ai donné la force pour lui permettre de continuer quand tout le monde abandonne,
et celle de prendre soin de sa famille en dépit de la maladie et de la fatigue.
Je lui ai donne la sensibilité pour aimer ses enfants d’un amour inconditionnel,
même quand ces derniers l’ont blessée durement.
« Je lui ai donné la force de supporter son mari dans ses défauts
et de demeurer à ses côtés sans faiblir.
Et finalement je lui ai donné des larmes à verser quand elle en ressent le besoin.
« Tu vois mon fils, la beauté d’une femme n’est pas dans les vêtements qu’elle porte,
ni dans son visage, ou dans la façon de se coiffer les cheveux.
La beauté d’une femme réside dans ses yeux.
car c’est la porte d’entrée de son coeur - le lieu où réside l’amour.
Et c’est souvent par ses larmes que tu vois passer son coeur.
« Toutes les femmes sont belles,
et nous devons les encourager à s’aimer telles qu’elles sont
et à avoir une juste estime d’elles-mêmes. »
Anonyme
Hnani POESIE
هي راهي الدنيا هذه ساهلة ماهلة، المهم اتبدّل طبيعتك … بالطبيعة الطبيعة متاعك هي إلّى تحكم في كل شيء… خلّى القالب متاعك كيف ماهو ما يسالش بدلو كيف تكبر شويا، لكن الطبيعة لازم تتبدّل ما فيها شيء هاتو اتشوف قدّاش اتولي سعيدة… تهي الطبيعة متاع الطبيعة إلّى خلقها ربي اتبدلت ولا عدت تعرف العام قدّاش فيه من فصل… الربيع ولا يجينا مرّة في قدّاش من عام… بالطبيعة ساهلة تبدّل طبيعتك وتكيّفها حسب طبيعة راجلك …يقلّك ما يتعاشروا ثنين إلّا ما يطيح الدرك على طبيعة المرا… يلزم طبيعتك تتكيف مع طبيعة الراجل إلّى ماهوش ملزوم باش يبدّل طبيعتو ،المسكين قدّاش منو؟ تهو بعد تعب الشارع ، يدخل للدار باش يعيش بطبيعتو… عاد ماتزيدش عليه انت و تطلب منو باش يبدّل طبيعتو إلّى عطاهالو ربي وإلّا خذاها من جينات والديه وباش يعمل بيها السلالة … انت ما عليك كان اتبدّل طبيعتك و تعيش سعيدة… علاش صحّة الراس ؟ قال شنوا هذيكا طبيعتي إلّى عرفني بيها… عيب هالكلام، إلّى تحب تهني على روحها من نهار صباح العرس تنسي شكوني هي و شنيا تربيتها وطبيعتها… مالا شنوا؟ يا حسرة كيف كنت بنت فلان. ا!!. بعد العرس ولّيت مرت فلان.. و الطبيعة و الدلال متاع دار البو تتمسح… بعد الزداق، اتفرّغ روحك و تسلّم روحك جهامة لراجلك و خليه يعبيك بالطبايع كل مرّة يحط طبيعة تناسب طبيعتو خاصة كيف يبدي متثقّف، اتهني واطمان، ما يسيبك إلّا ما يبدلك بكل ديمقراطية. القالب موش مستعجل تبديلو، توا هو يبدلو وقت ما يحب…
ماتقلّيش راهو حبني على طبيعتي .. الكلام هذا متاع وحدة ماهياش ناوية على العمار… انسي انسى كل شيء ، أنسي القانون وانسي الأحاسيس و انسي روحك يعيّش بنتي، الراجل راهو كيف ما قلتلك ما يصدّق يدخل لدارو و يسكّر باب دارو باش يتصرّف بطبيعتو… كان باش اتقلّقلو طبيعتو بطبيعتك وبالقوانين و تكسير الراس متاع الشارع راك يا بنتي ماكش باش اتهني على روحك.و ترصّيلك انت و صغارك قدام صندوق النفقة
طبيع
Hnani 7KAYIT HNANI
الأسبوع إلّى فات جابو برنامج تحسيسي في إذاعة المنستير للتبرّع بالأعضاء… في البرنامج وليّد وقلت عملية زرع كلوة ، وأختو إلّى تبرعتلو.. و طبيب من جمعية التبرّع بالأعضاء.
عاد يا سيدي البنية و الوليّد حكاو على قصّتهم و كيفاش وقع التبرع و الزرع و كيفاش هوما لثنين في صحّة جيدة.. و المذيعة و الطبيب يأكدوا على عدم وجود أي خطر باش الإنسان يعيش بكلوة وحدة… بعد اتحل التالفون للمداخلات.. المداخلات الكل كانت تشكر في البنية على العمل النبيل إلّى قامت بيه… و المذيعة باش اتزيد تحسّس العباد وصفتلنا جمال البنية و أنها راهي اتنجّم اتعرّس واتجيب صغار من غير حتا مشكل… لين الطبيب قال كان ماجيتش معرّس توا نتقدّم لخطبتها…
من بعد جات أم و قالت إلّى ولدها شباب عندو ثمانية سنين يستنى في كلوة و بالمناسبة تطلب فماش شكون يعطيه كلو و هي مستعدة باش تدفع أي مبلغ … الطبيب تحمّس و قاللها ، القانون يرفض بيع الأعضاء ، هي عملية إنسانية لا أكثر ولا أقل وسألها علاش ما تشوفش في العايلة.. جاوبتو إلّى هي حبّت تتبرّع لكن فصيلة دمها موش مطابقة لفصيلو دم ولدها…
جاء تدخّل آخر في نفس الحكاية مرا تطلب فمّاش شكون يتبرّع لقريبها… المهم في الآخر جات مكالمة من مرا تحب تتبرّع بكلوة… الطبيب قاللها على الإجراءات إلّى تقوم بيهم .. ثم سألها إنت معرسة ولا لا؟ جاوبتو إلّى هي معرسة… قاللها مالا يلزمك تاخذ ترخيص كتابي من راجلك اتجيبو معاك… المرا ما صدقتش وذناها سكتت ومن بعد قالتلو أنا انحب نتبرّع .. قاللها عاد اشبيه؟ انت مرت راجل و راجلك من حقو باش يرفض لأنو خذاك كاملة و ما يساعدوش باش ينقص منك شيء…زعما كيف باش تتبرعلو ليه هو مايسالش كيف تنقص منها حاجة؟؟
مانيش باش انحلّل أكثر انخليكم انتوما تفهموني الحكاية
Hnani 7KAYIT HNANI
هالنهارين عدة مدونات اتحط في نفس التصويرة متاع بنات عريانين ، و تحط في نفس قصيدة…. !!!علاش زعما ما فما حتا تدوينة خذات الرواج الكبير هذا؟؟؟ و علاش الحماس هذا الكل؟ زعما الحرية الجنسية عند بنات و ولاد الربط في خطر؟؟؟
باش مانطوّلش عليكم ، انقوللكم اتهناو ومن غير مجهودكم ، راهو الربط متاعنا ببناتو بأولادو ماهو فاهم من الحرية كان التحرر الجنسي والمخدرات و الكلام البذيء.. و كل تصرّف مسؤول و حضاري يشوفوه حد من حريتهم و يرفضوه …
و ثاني حاجة راهي التصاور هاكي هي دليل على اعتبار جسد المرأة سلعة و تحط من قيمتها…
A la liberté de provocation, répond la liberté d’objection
Hnani 7KAYIT HNANI
قالت ديانا “لأن المواطن التونسي، مهما علا شأنه و ثقافته ووعيه، هو كأي مواطن عربي يتفاعل مع الأحداث عاطفيا لا عقليا، فإنه يروّج و بكل الأشكال أن محاكمة عدد من المواطنين تتمّ لإعتبارات سياسية”
أوّل حاجة باش نسألها: هل ديانة “مواطن تونسي مهما علا شأنه و ثقافته و وعيه” ولا لا؟؟؟
و كان ماهياش “مواطن تونسي مهما علا شأنه و ثقافته و وعيه” آش امدخلها في مشاكلنا أحنا التوانسة؟؟ نتفاعلوا معاها بالعاطفة ولّا بالعقل ولّا بساقينا ولّا بالكرتوش هي آش امدخلها؟؟؟ قالك يا داخل بين الظفر و اللحم يا خارج بالنتونة (سامحوني)…
و زيد مادامك ماكش “مواطن تونسي مهما علا شأنه و ثقافته و وعيه” علاش تتدخّل في سلعتنا إلّى انروجوا فيها؟؟ أحنا التوانسة ما انحبوا ننصبوا و نبيعوا و نشريوا كان في الرحبة إلّى فيها السلع الكل من الخردة للفريب ، للجديد و نشيخوا كيف اندوروا على النصب الكل و نحكيوا مع البياع هذا ومع البياع هذا و انقلبوا ونفرزوا و نشريوا إلّى يساعدنا… انت آش امدخلك ؟؟؟؟
ثم انت فين تعرف القانون متاعنا باش تحكيلنا على القانون؟؟ القانون متاعنا يا ديانا يا بنيتي يلّى ماكش”مواطن تونسي مهما علا شأنه و ثقافته و وعيه”، يعاقب كل واحد قتل و كل واحد اتعدي و سرق ممتلكات خاصة ولّا عامة..و يعاقب كل واحد يكذب و ما يقولش الحقيقة… والقانون متاعنا أحنا التوانسة ينص على كونو الناس الكل سواء سياء و لهم الحق في العيش الكريم… ما عندناش في القانون متاعنا تفرقة و درجات في المواطنة.. ما عندناش البيدون…
ما نعرفش عليك منين انت ولا مانا ملّة “مهما علا شأنها و ثقافتها و وعيها” و رغم هذا نقلّك اتصوّر روحك أم صغيرات و جاء واحد و خذالك خبزتك و خبزة صغارك آش تعمل؟؟ اتقلو خوذ بالشفاء و خليني أنا و صغاري انموتوا؟؟؟ اتصوّر مجهوداتك إلّى تعمل فيها باش تركّز روحك في بلاصتك يجيك واحد امركّز أكثر منك و يطيرك منها؟؟؟ آش تعمل ؟ اتقلوا خوذ بالشفاء؟؟ نعرف آش باش اتجاوبني في قلبك على خاطر نعرف الصراعات إلّى هي “موش سياسية” الموجودة بيناتكم ناقصة كان تطييح الأرواح…
في الآخر بالله علاش ما عملت حتا غلطة في التدوينة متاعك كان في كلمة المطالبة و كتبتها المظطالبة في جملة “صحيح أنه من حقهم التظاهر و من حقهم المظطالبة بحقوقهم و رعاية مصالحهم” هههههه
Hnani 7KAYIT HNANI
