Hnani and the Family

في الصباح إنقوم ، ما صلّيت واشربت قهوتي وسمعت شويا أخبار و الأحوال الجويّة إلا و نلقي روحي الوقت كلاني … نحط ساقي في التاكسي و انقول للتاكسيست إعيّش ولدي فيسع راهو الوقت يجري … و يلزمني نخلط في الوقت… نوصل للخدمة ، نلقي الوقت فاتني … ملي ندخل للبيرو نبدي نقتل و نتقتل… قتلني دوسي و طلّعلي روحي،…دخل مواطن قتلني بالتسكبين متاعو… انا قتلتو بالمشي و الجيان و جيبان الوراق… دخلت زميلة حكاتلي نكتة قتلتني بالضحك، جاء زميل حكالي خبر قتلني بالغزول… مشيت لعرفي قتلتو بالسؤالات… رجعت للبيرو وقعدت نقتل في الوقت حتي يجي الوقت… هو الوقت يجي وانا نقص علي قتلان الوقت و نخرج نجري باش نربح الوقت … نوصل للدار نلقي روحي ميتة بالتعب و الوقت متاع المسلسل وفا… ازربني الوقت مشيت طيّبت عشاء خفيف.. بعد العشاء نلقي روحي ما عادش عندي حتا وقت باش انقري الصغار… إلي كملوا عليا وقتلوني بالطلبات متاعهم…

مشيت رقدت و حطيت راسي علي المخدّة وسرحت، وقلت: :يا لطيف قداش الوقت صعيب و قداش يجري والعمر يجري معاه … و الوقت متاع صبان الشهرية، مازال بعيد وماهو باش يجي إلا مايقتلنا… اللطف عليكم

Hnani خواطر