Hnani and the Family

لا حول ولا قوة إلّا بالله، من عادتي، كيف نتغشّش على شخص في عمر أولادي، نستغفر، و نحاول باش انريّض روحي ،وانقول يا هناني راك مرا كبيرة ، وما تعملش عقلك كيف عقل الصغار… حتا لو كان يغلطوا، ما يلزمنيش نكون صعيبة معاهم… يغلطوا في الكبير، في الصغير ، ما يسالش.. نحسبوهم ولادنا و يكون منا العقل كيف مانقولوا… و هوكا ساعة ساعة ترميلهم تدوينة ولا تعليق باش ما يغلطوش برشا، و ما ينساوش رواحهم.
لكن التعليق إلّى جاني في التدوينة متاع البارح ، من عند تيتوف مولا العمايل ولّى دافعت عليه بعد ما عمل عملتو إلّى الناس الكل تعرفها….خلاني نتغشّش …و ما نجّمتش انريّض روحي رغم تعويذاتي من السيطان.. أولا لأنو تعليقو خارج الموضوع… ثانيا، كيفاش قاعد يستنا فيا نكتب أوّل صفحة متاع سيناريو، باش ينقّز ويتصوّر روحو لقي الدليل المادي ،على كونها تدويناتي السابقة في موضوع الإرهابيين كانت أفلام و خيال…
هاو آش قال (قلتلكم راي امي هناني مبدعة في كتابة الافلام خاصة الفيلم متاعها اك المرة الي فاتت عالاسلامين الي يحبو يحولو تونس لحمام دم برشة خيال وحبكة قصصية
و اصل امي هناني اكثر من رائع )
باش مانطوّلهاش و هي قصيرة ، انقلو : يا تيتوف ، التدوينات إلّى كتبتها على الخوانجية، ربي يبعّد بلاهم علينا ، راهي لا هي أفلام ولا هي خيال… و يعيّش ولدي ، رزّن روحك و اكتبلنا حويجات على عمار و وليداتو … ويزّيك من شريان الشبوك .

Hnani 7KAYIT HNANI