هناني تخرّف للحاج كلوف على معاذة العنبرية
الحاج يحكي وحدو :الحمد لله على دين الإسلام
شكون طهّر يا حاج وإلا شكون حج ، أشبيني ماسمعتش لا تزغريط ولا سولامية في الربط
لا يا هناني ما فما شكون طهر ولا شكون حج، و السولامية ماهي اتلمت ابكلها ليلة المولد في السيد الصحبي في القروان و غنات حتا الصباح .
تلقاهم مالا عملوا ليلة كبيرة يا حاج يا خويا، والضياف راهم شاخوا واتمتعوا بالسولامية، اشاي لله يا سيدي الصحبي
ماتلزنيش للكذب يا هناني … ما نعرفش كان مشاو الضياف متاع القروان عاصمة الثقافة المسلمة … على خاطر سمعت والله أعلم إلى هوما مايحبوش الإحتفالات بالمولد
اللطف يا حاج يزي ماتقول هالكلام… راهم مسلمين كيفنا كيفهم… مالا ماتقليش ما كلاوش عصيدة الزقوقو؟… ردهك عاد كفار !!!
قالك يا هناني الإحتفال بالمولد موش باهي … بدعة اللطف… والرسول عمرو ما عمل عيد ميلادو ولا كلا عصيدة الزقوقو..
ربي يستر يا حاج مالا… تلقاهم روحوا متغششين علينا … وراهم ندموا على القروان قلب الفن المسلم.
عاصمة الثقافة المسلمة يا هناني… أشبيك رديت العاصمة قلب والثقافة فن ؟؟ يزي من البهامة يهديك…
علاش بهامة اللطف على السامعين؟ الفن موش ثقافة؟ أنا ورحمة أمي ديمة فين نسمع كلمة ثقافة في الراديون نسمع معاها كلمة فن…
سيّب عليك يا هناني الثقافة بعيدة عليك وماتنجّمش تفهمها…
باهي ما قلتليش يا حاج مالا شبيك تحمد في ربي على دين الإسلام ؟
حمدت ربي يا هناني على خاطر لقيت ولدك بشبوش اتحرّك وصلّح شويا في الدار….
تعرف يا حاج البارح تفرجت على مهرجان فلموات البيئة في القروان وراني ما فهمت شيء..
شد الحاج راسو و قال: الله الله الله يا هناني، توا انت الثقافة ما وصلتش باش تفهمها واتحب تفهم البيئة؟؟؟
علاش ما نفهمش يا حاج ؟ كان جاو يتكلموا بالساهل راني فهمتها… أما هوما يتكلموا بالصعيب…
المحافظة على البيئة يا هناني معناه ما عدت اتلوح شيء و نقص من الزبلة وساشيات النيلون…
علاش ماعادوش يحبوا يلوحوا شيء اللطف … يوليوش كيف معاذة العنبرية؟؟؟
شكوني هذه معاذة العنبرية يا هناني؟ وشنيا قصتها؟؟؟
هذه يا حاج كلوف يا خويا مرا كانت يقولوا عليها مشحاحة و حكاية الشح متاعها من قديم الزمان يحكيوا بيه…
قالك يا سيدي ويا بن سيدي و يا مرحوم الوالدين ، معاذه مرا مشحاحة وما تحب اتلوح شيء .. نهار العيد الكبير راجلها جابلها علوش باش اتضحي بيه.. ذبحت العلوش وحطت الدم في طاسة و الجلد على شيرة واللحم في قصعة والدوارة نظفتها وحطت وسخها في ساشي .
و قالت : اللحم ناكل منو شويا و الباقي نعملوا قديد
العضم متاع اللحم إلى كليتو نحطو حطب في الطابونة
العصبانة ناكلها
الفواضل متاع العلوش الي نحيتهم من العصبانة اشيّحهم ونشعّل بيهم الكانون
الراس ناكلو
والقرون نعملهم معلاق
الجلد انظفو ونعملو فرش
الدم نستعملو صبيغة وندهن بيه القلة إلى باش نصنعها
بالله يا هناني كان جات حية هذه معاذة العنبرية راهي خذات جايزة متاع إلي يسميوه الطاقة المستديمة
يزي يا حاج كيفاش مرا مشحاحة تاخذ جايزة؟ اللطف حتا العضام والفرت متاع العصبانة ما سلمتش فيهم..!!
