Hnani and the Family

On vient de creer une solution pour ceux qui veulent integrer leur Yahoo messenger avec Facebook.

Sorry ya barbach, on a pas eu le temps pour fixer les problemes que tu m’a parle
Pour plus de details:
http://www.ymessengerblog.com/blog/2009/03/12/pingbox-now-available-for-facebook/

Uncategorized Facebook, Yahoo

كيف العادة هناني و الحاج كلوف يقصدوا ربي ويمشيوا يعديوا المولد في القيروان… زيارة السيد صاحب الجاه و صاحب رسول الله و الحفلة متاع جامع الكبير لازم منهم حتا لاخر العمر..

خذينا لواج و قصدنا ربي.. السنا المولد متاع القيروان مولدين… مولد النبي صلي الله عليه وسلم و مولد القيروان عاصمة الثقافة الإسلامية..

من شطر الثنية فين وصلنا لمعمل العجل الي قالوا مقيّد فلسة… واحنا رقابينا امشنقا نغزروا لشيرة القيروان فماش ما تظهرلنا صمعة الجامع الكبير تشعل… ماهو قالولنا الأضواء إلى اتعملت في القروان عام السنا ما صارتش و جابولها فرنسيس باش تعملها… برا اللواج تمشي واحنا رقابينا ولّات توجع واتجبدت… ولا شيء ظهر من الصمعة… حتا لين قريب نوصلوا شفنا المدينة ظاوية موش كيف العادة … فرحنا وباركنا لبعضنا بالمولد … و قلت للحاج كلوف: شفت يا حاج القيروان كيفاش ضوات؟ زايد يا حاج كل بلاد ما تتنور كان باماليها…

قال الحاج كلوف: علاش يا هناني فين كانوا أماليها ؟ ماتقليش عام كامل البلاد فارغة و ساكن فيها البوم حاشاكم؟

قالت هناني: سمعت والله أعلم يا حاج إلي اماليها خرجوا منها و تركوها… تلقاهم الليلة جاو للمولد و ركبوا أوانب الضو باش ما يمشيوش في الظلام وقت ما يهزوا أصحاف عصيدة الزقوقو لبعضهم ….

اتنرفز الحاج وقال: شوف يا هناني هاللغة متاع ولاد البلاد هجت من البلاد لوغة موجودة في كل ربط وكل زنقة … وعلاش كان القروان قاعدة ظلمة و ما تضوي كان في المولد؟

الحق الحق يا حاج مانعرفش علاش …

مالا يزي من التخلويض … الليلة الأوانب متاع الضو تشعل على خاطر شيخ الربط كان باش يجي … و زيد جاو ناس كبارات من العالم الإسلامي الكل باش يدشنوها عاصمة متاع المسلمين …

تكونش مالا جماعة العالم الإسلامي هوما أماليها؟؟ ماهم هوما إلي بناووها… هاو بعد ألف عام رجعولها .. حتا هي يا حاج و رحمة أمي قعدت وحدها في الوهرة متاع البلدان الإسلامية خاصة إلى عندها تاريخ كبير كيفها ولا حتا أكثر منها شويا…

لا يا هناني موش عاصمة بالصحيح… عاصمة متاع ثقافة إسلامية لمدة عام 2009 هاو مشي منو شهرين و8 أيام … وشيخ الربط ماجاش.. وكانك على الوهرة ماتخافش ماهو باش تفكهالها حتا بلاد… هي مكة اتبدلت و ولات عالم آخر…

ووه يا حاج كيفاش الشيخ ماهوش في العاصمة مع الضياف؟؟ يبداش متغشش وما يحبش يكريلهم البلاد خايف لاتولي عاصمتهم بالحق؟؟؟

لا يا هناني الشيخ مريّض … و القروان عمرها لاتولي حتا ربع عاصمة…

اللطف على الشيخ … يزي يا حاج كلوف راهي القروان ترابها سخون … وعلاش ماتوليش ربع عاصمة يا حاج ؟؟؟ قالك تقريب زوز وإلا زوز ونصف كياسات اتكيست … وثلاثة ولا أربعة بطاحي اتفرشت… و أربعة وإلا خمسة بيبان في السور تعمل فيهم الضو … ودار الحفلات تعمل فيها كراسي جدد جات من الخارج.. كيفاش اتقلي ماتوليش عاصمة؟؟؟ ما نحكيلكش على الضو متاع الصمعة والسور…

اللواج وصلت ، خلصناه 7 دينارات و800 مليم و حبيت نهبط ما نجمتش…

الحاج كلوف : هيا يا هناني أهبط خليني نهبط والعباد تهبط…

كيفاش نهبط يا حاج يا خويا راني ما ريت شيء الدنيا ظلمة و القاعة بقايع بقايع…

سمي باسم الله يا هناني واهبط تلقاهم البقايع حفر هاذوكا … حط ساقك بالشويا وشد في باب اللواج باش كان تلوات ساقك ماتطيحش…

فينوا الضو يا حاج ؟ فينهم الأضواء إلى شفناهم تضوي في البلاد الكل؟

أهبط يا هناني و رد بالك على ساقيك.. الأضواء هاكي قالك في المسلك السياحي …

مالا أحنا فين يا حاج تهانا بعاد على صحب الجاه 100 ميترو … شوف الأضواء متاع بطحة صاحب الجاه قداش تشعل تقول عليها نهار… واحنا مانا سياح يا حاج ماتقليش ردونا ولاد البلاد…

المسلك السياحي يا هناني هو للضياف الرسميين و يكون معاهم دليل سياحي مسؤول عليهم وما يخليهمش يخرجوا منو ولو بميترو واحد.. و زيد قالك ما يحوسوا بيهم كان في الليل وقت البلاد تبدي فارغة من المناظر…

انحب اتهزني في المسلك السياحي إلي علي البحر يا حاج يعيشك…ماك تعرفني انحب المناظر الطبيعية … مالا كيفاش باش انزور حبيباتي متاع الجبلية و هوما ماهمش في المسلك السياحي؟

امشي يا هناني لا يطيح فيك سيدي سحنون … واترصيلك طايحة في حفرة قبل ما توصل للمسلك السياحي.. و توا انزوروا حبيباتك كيف اتدوخ بالنوم ولا عدت اتفرق بين الضو والظلام…

Hnani 7KAYIT HNANI

شبيك يا هناني امبدلة اللوك متاع البلوق؟
اليوم عيدي يا حاج كلوف يا خويا.. عاد قلت انبدل اللوك متاع الدار
قال الحاج: موش كان بدلت اللوك متاعك أحسن؟ وعملت شويا حنة للشيبات متاعك يا هناني؟
ووه يا حاج؟ شبيك ما عدتش تعرف سبرنا في العيد؟ المرا يلزمها في كل عيد اتنظم دارها … تجرّد وتقلب بيت القعاد و تفرش فروشات جدد
قال الحاج: في بالي عيد الأم مازال ماجاش …وعيد المرا نهار 13 أوت و عيد الجدة مازال كيف تعدي وانت مازلت ماكش حتا حما… كيفاش اليوم عيدك يا هناني…
اليوم عيد المرا يا حاج… اليوم العالم الكل باش يحتفل بيه .. كيف المسلم كيف الكافر كيف الى لا عندو لا دين لا ملّة… بكلهم باش يعيدوا و يفرحوا فرحة وحدة…
اتبسم الحاج تبسيمة ماهياش هي وقال: والله المرا تستاهل كل خير.. مالا اليوم لا فما حتا مرا باش تاكلها من عند الراجل…
مالا يا حاج .. ربي كريم… الأم هي إلّى تجمع العيلة … و المرا هاي هي إلى تجمع في العالم في عيد واحد…
صحة ليكم يا هناني … هي الجنة تحت أقدام الأمهات … الواحد كان ما ترضاش عليه أمو … الجنة ما يدخللهاش…
مالا يا حاج كلوف يا خويا… الحمد الله العالم عرف قيمة المرا و عرف إلّى الجنة تحت رجليها …
لا يا هناني الرسول صلي الله عليه وسلم قال الجنة تحت أقدام الأمهات موش تحت رجلين المرا…
ماهو كيف كيف يا حاج ،المرا ماهي الأم والزوجة والأخت وبنت الجيران و الزميلة … كان كل واحد يعرف قيمة أمو… ماهو بطبيعتو باش يعرف قيمة النسا الكل..
شكون يفهمك يا هناني؟ توا الناس الكل في الجرايد والتلافز تحكي على قيمة المرا … لكن في الواقع هاك اتشوف.. المحاكم امعبية بالقضايا و النساء والرجال كولني ناكلك … كيف المتدينين كيف الموش متدينين…
ربي يلطف بينا يا حاج … أنا ماعدتش فاهمة شكون يدافع على مصلحة المرا وشكون ضدها … القانون عامل المساواة بين الراجل والمرا والواقع كيف مانقولوا بيبان مسكرة وهموم امفرقة اللطف عليكم
القانون في المحكمة و الكتب يا هناني موش في الديار و الخدم… في الديار كل راجل عندو قانونو الخاص مركبو شويا من العادات وشويا من الدين وشويا من القانون و شويا من مخو… و كل شويا تخدملو مصلحتو وترتحو…
صحيح يا حاج يا خويا والله الدنيا صعبت على المرا .. هذاكا علاش عملولنا عيد باش يفرهدونا فيه …
قام الحاج شد عكازو ومسح على شليغماتو وقال: مالا يا هناني هاتلي القفة خليني نمشي نشريلك هدية انت و هنونة في هالنهار السعيد و نفرهدكم..
يعيشك يا حاج ولا ينحيك علينا … شنيا الهدية إلى باش اتجيبهالنا؟
باش انجيبلكم يا هناني عصبانة وراس … تشيخوا فيهم و اتطيبولنا كسكسي بالعصبان وهرقمة بالراس…
رجعت القفة للكوجينة وقلت للحاج: يعيشك يا حاج ولا يشقيك .. موش لازم الهدية في عيد المرا …خليها للعيد الكبير أحسن.

Hnani 7KAYIT HNANI

مانيش باش نستني يوم تحسيسي وإلا يوم وطني للتضامن مع المصنصرين “تونس في بلد البنوك” و”زبراط من جنيف” باش انقول لا لعمار و عميرات .. لا للصنصرة.. لا لإسكات أي صوت مهما كان إتجاهو… لا للقمع من أي طرف كان.. لا للإرهاب الفكري من أي تطرف … لا لممارسات التخلف … لا لتعميق الخلافات باتهامات دون أدلة.. لا للتكتلات والحسابات الفارغة… لا للخوف لقول كلمة حق في كل شخص أو فكرة مهما كان الشخص ومهما كان صاحب الفكرة… لا للقبلية والتعصب والعمل على تونس أولا (ههه نعرف فين مشي مخكم)ا
عندي برشا لالات لكن يزيني توا وكان اتحب اتكملوا انتوما كملوا وهناني وربي معاكم

Hnani 7KAYIT HNANI

هالمدة الحركة في الربط راكحة، لا حد يمشي لحد، قل هو الله أحد عليهم.. أنا أميمتكم مانجمش ما نزورش جيراني و زيد حتا كيف ناخذ ثنية طويلة وما عندي شنوا زاربني باش انروّح للدار … أي دار نلقي بابها معرّج ندق عليها و ندخل نعمل ترتيحة في الصقيفة متاعهم..
اليوم مشيت نزور في خويا الحاج كلوف اتوحشتو عندي مدّة ما ريتوش … دقّيت الباب… يحل الباب خويا الحاج كلوف… سلّمت عليه بالتعنيق والبوس اتقول عليا عندي دهر ما شفتوش…
قالي الحاج: ع السلامة يا هناني الخطا السعيد؟
قلتلي : اتوحّشتكم واتوحشت القعدة والنقاش معاك يا حاج..
ضحك الحاج بالتقهقيهة متاع العادة وقال: الله يتولاك يا هناني ، ولّيت تتكلّم بالفقهي وتعرف آش معناها نقاش؟ هيا أدخل للبيت …
دخلت للبيت نلقي هنونة مغمومة بالعباين وحاطة على راسها تعصفيرة ومنشفة…
سلّمت عليها و قلتلها: اللطف عليك يا هنونة، بيكش ماك لاباس؟
قالي: مريضة يا هناني الكحة والعطسة عاملين فيا …
قعدت بعيدة خايفة لا الجرثومة اتنقز عليا رغم إلّى أنا ملقحة و قلتلها : ان شاء الله لاباس و ربي معاك، شكون عداك ؟ مشيتش للطبيب ؟
قالي الحاج: مشات يا هناني وكملت زرارقها الكل، و شيء، النافع ربي ، الطبيب قال إلّى الفيروس قوي وما يخرج من البدن كان بصعوبة
قلت : أنا ملّى شفت الناس الكل تعطس واتكح شديت الدويرة و نزلت على عصير البرقدان، الطمسن والمدنينة الشنوا غالين ساعة ساعة نشري كويلو باش ما نتحرمش منهم فرد مرة..
ومن غير مانخلّيهم يحسوا بيا زدت اتمحمست وابعدت عليهم شويا…وقلت : والجاه والبوخاري يا هنونة أختي ماتكون كان عوينة وصابتكم… خليني نجيب الكانون وانبخرلكم.
الحاج سمعني نحكي على البخور اتهز وتنفض وعطس عطسة هزتني ونفضتني و قال: لا يا هناني أختي رد بالك راهو البخور يقطع لكسيجان في البيت و في البدن..
قلتلو: رحمك الله ياحاج ، و يعيّش خويا ما تتغشش مني، كيف اتجي تعطس حط يدك على فمك باش الجراثيم ما تلوّثش الهواء… مالا هذاكا علاش حكّة البخور ماهياش في الطبق مع الكانون؟
قالي الحاج: يرحمنا ويرحمك الله و يهدينا ويهديك الله ، الحمد لله يا هناني فخارنا من فخار بكري ، سامحني يا هناني ، العطسان عمل فيا لين خلاني نعطس من غير مانحط المحرمة على فمي..
قلتلو: لازم تتأدّب يا حاج كلوف يا خويا، حط ديمة المحرمة في جيبك باش كيف تجيك العطسة تحترم الناس إلى بحذاك
الحاج وجهو زفطر و شدّتو الكحّة … يكح و يتكلّم… بالله يا هناني أنا مانيش متأدّب؟ و رحمت والديا كان ما جيتش نعرفك إلّى انت ماكش فاهمة آش تقول !!!
أنا شفتو شدتو الكحة وانا خفت عليه لا يشرق … قلتلو: بالشويا يا حاج سايس لا تشرق واترصيلنا نظربوا فيك على ضهرك باش لغلوغك يتسرّح …
الحاج كلوف باقي الكحّة ما سيبتوش … يكح ويقول: هناني من غير مطرود، برا شد دارك وما عادش تجيني…ولا عدت تتناقش معايا ولا نتناقش معاك.. وموش لازم باش اتزورنا وانزوروك..
مشيت جبتلو كاس ماء و قلتلو: أشرب يا حاج بالشفاء .. الروح راهي عزيزة .. هاك شفت الكحّة موش باهية … تنجّم اتخرّج روح مولاها و تعدي إلّى يجي يزوركم.. لازمك يا حاج تشري السيرو متاع الكحة الشايحة…
اتمحمست هنونة من تحت الغطاء و قالت: شفت يا هناني أختي راهو هو إلّى مرضني ، عندو مدة يكح في كحة شايحة وما يحبش شكون يجبدلو على الطبيب و الدواء.. ما يحبش يستعرف بالمرض…
قال الحاج: أنا مانيش مريض.. أنا لاباس عليا الكحة الشايحة ماهياش مخطرة والعطسان على خاطر بدني ناقص أكسيجان من هاك البخور.. عاد أنا كيف عديتك علاش ماتكحش كحة شايحة كيفي؟ علاش كحتك جات مبلولة؟
هنونة شدها كريز الكحة المبلوبة و قالت: كان ما بديتش انت بالكحة راني لاباس عليا..
الحاج شدتو الكحة الشايحة و قال: لا كحتي موش كيف كحتك ، الكحة المبلولة أخطر…
هوما بداو يكحوا لثنين ويتعاركوا على كحة شكون أخطر …و شكون بدا بالكحة… حطيت سفساريا على راسي و قلتلهم أيا أقعدوا كحوا على راحتكم خليوني انروح الليل طاح عليا..
وانا في الثنية باش ندخل لدويرتي ونسكر على روحي تعرضني جارة .. أنا سلمت عليها وماهو مانقلكمش ،اللطف عليكم رصاتلي نعطس و فليساتي متاع الماكلة إلّى كليتها الكل مشات خسارة.

Hnani 7KAYIT HNANI

النقاش في الدين مانحبوش لأني مرا نعرف قدري وماهوش ساهل الحديث فيه، لكن كيف الحكاية توصل أن ناس تكتب باش تسب الجلالة و رب الإسلام و تفتخر بما تقوم بيه وفا سلطان السورية من لقاءات للهجوم على الإسلام كدين، موش ضد ممارسات خاطئة متاع شواذ، هنا لازمني باش نتكلّم
وقت ما وفا السورية تستجدي الأمريكان باش يحميوا بلادهم من الدين الإسلامي وقتها نتكلّم وانقلها الأكيد حادثة بنت خوها أثرت فيها إلى حد المرض النفسي و يلزمها تعمل حصص تيرابي.. وأن الأمريكان متدينين و الأصولية عندهم طالعة أكثر من ماهي متصورة.
ثم يلزمها تفهم إلّى العداء للإسلام في السنوات هذه والسنوات القادمة ماهوش ناقصها و الحفاوة إلّى قاعدة تلقي فيها في وسائل الإعلام إلّى هي ماهياش ملحدة ( الأمريكان متدينين فوق ما يتصوّر أي واحد) ماهو إلّا باش يخدم دياناتهم وباش يهاجموا الإسلام ، أي أنها خبيزة مريضة نفسانيا يستغلوا فيها لا أكثر ولا أقل .
علاش ربطت خروجها للشارع وحدها وشربان قهوة وحدها والحديث مع الجار ، بالإسلام؟ علاش ما حكاتش عليهم وربطتهم بموضوع الديمقراطية؟ أنا نعرف علاش، على خاطر أوروبا وأمريكا ماعادش يهمها حكاية الديمقراطية، ماعادتش اتجيب الخبز، توا الخبز يجي بالهجوم على الإسلام بتعلّة القضاء على الإرهاب إلّى مشات بيه هيفا سلطان لأقصي حد و ربطت الإرهاب بالإسلام و بالنبي محمد صلي الله عليه وسلّم.
علاش مثلا ما مشاتش لروسيا باش تهاجم الإسلام؟ والروس أغلبيتهم ملحدين، علاش مشات لأمريكا و أوروبا إلّى هوما ناس متدينين والمسلمين المسالمين قاعدين يتحملوا في تبعات أعمال ناس متطرفين؟
علاش الروس ماستدعاوهاش باش يعملوا معاها برامج ونقاشات و يزيدوا يدعموا الإلحاد متاعهم؟ هل لأن الملحدين الروس ما يؤمنوا بحتا دين وما يهمهم في حتا دين و هوما ضد كل الديانات وما تلقاش شكون يقلها الإسلام موش باهي والديانات الأخري باهية؟

Hnani 7KAYIT HNANI

العزايز من عند ربي خرنانة، وكيف اتشد موضوع تقعد تحكي فيه وماتسيبو كان ما قربتها تفرغ.. هالكلمتين و قص قال شنوا الفاهم يفهم ، ما تجيب شيء في هالوقت..
هذاكا علاش باش نرجع نحكي في حكاية الفايس بوك… يا سيدي بعد الحوسة إلّى صارت وقت ما تسكّر الفايس بوك في تونس… وحدة من الناس دوبا ما رجع تحل مشيت نجري حليت فايس بوك متاعي… و بديت باستدعاء وليداتي والعايلة… و من بعد جاتني شويا إستدعاءات من ناس نعرفهم و من ناس ما نعرفهمش… والكل قبلتهم أصدقاء لأنو الواحد يحشم باش يرجّع استدعاء إنسان… حتا فمّا واحد من أصدقائي في الفايس بوك نعرفوا من سنين الله و يعرفني مانطيقوش في الماء ورغم هاكا قبلتو صديق… المهم عملت أصدقاء الله مصلي على النبي… و فما بعض أصدقاء أنا طلبت باش انكون صديقتهم البعض من أصدقائي المدونين و البعض الآخرلأنهم في مجال الثقافة معروفين والغاية كانت باش نعرف آش يحكيوا ونستفاد منهم لا أكثر ولا أقل.
أيا سيدي بديت أمّيمتكم ملّى نحل الأنترنات باش انشوف الرسائل متاعي ، نلقي الرسائل أغلبيتها من الفايس بوك… من غير ما نشعر انكون باش نقري آش فمّا في المدونة وإلّا أخبار أخري، ننزل طول على رسالة اتدخّلني للفايس بوك… و برا عاد وقتاش نخرج منو..(.لا عدت لاهية بالتدوين ولا بالخدمة)… بالطبيعة فمّا بعض الأصدقاء إلّى يكتبوا قصائد ولّا نصوص لكن ما عندهمش مدونات و بالتالي جاتني الفرصة باش نقرالهم ونعرفهم، لكن باش نحكي على الأغلبية إلّى ما تلقي شيء مهم عندهم وزيد حتا كيف انقول حاجة في نيتي باش نتناقش فيها مع أصدقائي ما نلقي حتا نقاش…
اليوم وانا قاعدة انفكّر باش ناخذ موقف من القانون الجديد متاع فايس بوك،إلّى حكيت عليه في تدوينة سابقة، ولّى ما لقيتش شكون تفاعل معاه كيف ما يلزم غير كعيبتين و أحد المدونين إلّى كان هو أوّل من جابلنا الخبر..ممكن توا كيف الفرنسيس وإلّا الأمريكان إلّى قاعدين يخرجوا من الفايس بوك ويعملوا شوهتهم على القانون والغورة متاع فايس بوك ، وقتها انتبعوهم ونعملوا الشوهة معاهم … نلقي واحد من صحابي ولّي هو في الحقيقة من الناس إلّى أنا اخترتهم واستدعيتهم باش يكونوا صحابي، باعتبارو مثقّف كبير في الربط، نلقاه حاطط “هيجوا لبات هيجوا، ماكانش توا انسكّر أمو” الحقيقة تصدمت أنا ، ثبّتت لقيتو الراجل هو، وزيد قريت التدخلات… قلت و على الدنيا السلام، خاصة بعد ما قعد مدّة يتناقش “الفايس بوك فيك الجبورة وإلا لا” ثم “شنوا الفرق بين الجبري و وراء البلايك والقعر و ……. ” والله انسيت الأوصاف الأخري الغريبة….
كيف عاد لقيت موضوع النقاش متاعو، حلفت بالله إلّا مانسكّر الفايس بوك أنا و يزّيني من وجيعة القلب… نسيت باش انبشّركم إلّى راهو قاللنا زاد وحدة زوّالية في مسلسل مكتوب لرمضان الجاي ماخذة بخاطر البعض (المزمرة بالطبيعة)
أنا بحكم تكويني العلمي انموت على العلم والتكنولوجيا، وانحب نعرف إلّى موجود في العالم الكل، وندخل وانسنس و نجرّب ، لكن كيف نلقي شيء ما ينفعني في شيء غير تضييع برشا وقت و نقاشات لا تزيد ولا تنقّص (ممكن اتنقّص في العمار) نخرج منها وانا مقتنعة .

Hnani 7KAYIT HNANI

أيا سيدي باش ما تبداوش غافلين على الشيء إلّى قاعد يصير في تونس من جراء تأثير النهضة الحضارية إلّى تشهدها البلاد العربية .. نهار الإثنين سمعت برنامج في إذاعة جوهرة يحكي في موضوع الخيانة و الغدر بأنواعو… أيا جات طفلة عمرها 16 عام و بدات تحكي كيفاش راجلها غدر بيها و قالت إلّى هي عرست كيف كان عمرها 14 عام بطفل عمرو 17 و زواجهم كان زواج عرفي ، كتبوا ورقة وبحظور زوز شهود
دارهم ما فيبالهمش، كيف حبلت هزّت روحها و مشات لدار أخت الطفل ( بالطبيعة الأخت خايفة على خوها من الحبس) و عاشت فيها حتا ولدت، و بعد ما ولدت الطفل هرب و هي قعدت حسب ما قالت من دار لدار في ديار صحابها( الله أعلم شنوا نوع الصحبة) و توا تحب السخطة راجلها يرجعلها بعد ما مات صغيرها
المذيعة ما هياش امصدقة إلّى تسمع فيه قالتلها و كيفاش مات الصغير؟
جاوبتني بدم بارد وبكل وقاحة : خليتو بحذا صاحبتي يخّي مات
عاودت قالتلها يا بنتي رانا ما عندناش زواج عرفي في بلادنا
جاوبتها: علاش؟ كتبنا ورقة و جبنا زوز شهود
ولّات المذيعة قالتلها، هاو عندنا نومرو التليفون متاعك ولازم نتصلوا بيك بعد البرنامج وانشوفوا معاك المشكلة

Hnani Uncategorized

البارح قريت تدوينة لولادة تحكي على عزيزتها أمي سعيدة الله يرحمها ، الحكاية عجبتني لأنها تحكي علي فترة من الزمن في النصف الأوّل من القرن الماضي، فين المرأة كانت حدها حد الكوجينة و الغسيل.. و رغم هاكا كانت اتنجّم اتقول لا للراجل إلّى كيف يغلط و يضربها من غدوة يطلب السماح بسنة ذهب و قصّة قماش …لأنو عاطيها قيمتها و يحترمها.
و زيد كيفاش كانت متمتعة بحياتها و بحب راجلها الله يرحمو و صرّتها إلّى كانت ديمة فيها الفلوس رغم أنها لا كانت تخدم ولا شيء.
بعد ما عملت كيف على الحكاية و قلت الله يرحمكم يا جدودنا كيف حرّرتونا و عطيتوا للمرا حقها و قيمتها رغم التخلّف إلّى كان عليه المجتمع في هاك الوقت.. و زيد رحّمت على محمد السنوسي و الشيخ سالم بن حميدة والطاهر الحداد و بورقيبة إلّى وصلوا المرا التونسية للوضعية إلّى يحسدوها عليها العرب الكل ولّى قاعدين النساء و الرجال العرب المتنورين يجاهدوا باش يوصلولها.
بعد ما سرحت وانا انرحّم على فلان وعلى والدين فلتان، يفيّقني من السرحة تعليق من واحد شباب يقول( ” الله يرحمها و بالحق الناس كانت باهية و عجبتني صفة جميلة و هي أنو كلات بونية و ما طيحتش كلمة راجلها و آني مانيش مع ضرب النسا و لكن نسا بكري كان معدنهم أصيل و ثمة عض النسا أتباع المسلسلات المصرية إلي يا دوبك تسمع مجرد كلمة من عند راجلها و تلقاها الشنطة و رايحة على دار أبوها. الله يرحمها أمي سعيدة”)

ما نكذبش عليكم قريت التعليق ثلاثة مرات باش نفهم كيفاش الوليّد هذا أهم حاجة عجبتو في الحكاية هي كيفاش أمي سعيدة كلات البونية و طاحت سنتها وهي ما طيحتش كلمة راجلها، و من بعد يقول إلّى هو ضد ضرب النسا..
و رغم هاكا ما وصلتش باش نفهم التناقض إلّى في تعليقو.

Hnani 7KAYIT HNANI, FEMME TUNISIENNES

هيا مرحبا يا جماعة، مانيش امسيبتكم، متخالفين متفاهمين ، اتصنفوني ماتصنفونيش ، أنا عزوزة و شدّيتكم، هاني باش مانقولش عزوزة و شدّت سارق..
عاد يا سيدي اليوم نهار كامل وانا مخّى يغلي ، مرّة نضحك ومرّة انحس بالفوارة و نتغصر، الحقيقة بعد ما قريت البارح على مرض الشيخوخة إلّي يتسمي الزهايمر، حالتي متاع اليوم ماتطمنّش و ربي يسترني و يستر جميع المومنين و حتى إلّى ماهمش مومنين، ماهو الرفق بيهم باهي..
عاد نرجع لموضوعنا إلّى خلاني اليوم اندور كيف الزربوط، و نستخايل في حاجات موش باهية بالكل.. الجماعة كتبت على التغيير الجديد إلّى صار في قانون إستعمال الفايس بوك، قالك يا سيدي الفايس بوك يقلّك ” اتحب تخرج مني ؟ برا أخرج ربي معاك ، لكن راهي المعلومات و التصيورات إلّى حطيتهم ولّاو متاعي و نتصرّف فيهم مدي الحياة”
عاد ما نكذبش عليكم ، ما خفتش على المعلومات ينفخها و يشرب ماها كيف ما قالي الحاج كلوف ما عندي ما حطيت فيه غير كلام عام ما فيه شيء ينفع، وإلا ساعات نبعث وردة ولّا قليّب و كيف كيف نقبل وريدة ولا قليّب، لكن المشكل في تصيوراتي و تصيورات عايلتي… عاد مخي نهار كامل يدي و يجيب و نتصوّر بعد ما نموت و يكبروا أحفادي ، و هوما متعدّين في شارع من الشوارع يلقاو تصويرة جدّتهم هناني في معلقة متاع إعلانات؟ و ربي يستر آش باش يكون موضوع الإعلان… و إلّا يشوفوا تصويرة جدّتهم في التلفزة مع جماعة يقولوا عليهم إرهابيين و شدوهم ما نعرف فين ؟ و إلّا في مجلّة من المجلات إلّى تحكي مثلا على موضوع الهبال حاشاكم و يحطوا تصويرتي على أساس عملوا معايا انترفيو في مستشفي من المستشفيات؟
الحقيقة مخي دخل بعضو وقلت إلّى هزتو ساقيه العصا ليه، ولّى قلّقتني أكثر هي حكاية قسمان الفلوس مع الفايس بوك كيف انولّى مشهورة… مالا!! قالك كيف تتشهر الفايس بوك عندو باي لازم ياخذو، ماهو هو إلّى شهرك !!! وانا قاعدة انحس في روحي بديت نتشهر و الشهرة على الأبواب ما نخبيش عليكم.
يا سيدي حكاية التصاور اتنجّم تتعدي و توا قبل مانموت نكتب وصيتي وانبّه على أحفادي باش يردوا بالهم وما يصدقوش إلّى ممكن يصير بتصاوري، لكن حكاية القسمة متاع فلوس الشهرة يستحيل انوافق عليها… أميمتكم الله أعلم بيا قدّاش انعدي وقت وانا من فايس بوك لفايس بوك نقري و نكتب وانحط في التصاور اتقول عليا نخدم عند سيادة الفايس بوك و بلاش حتى فرنك .. باش الفايس بوك يكبر و مولاه يربح الملياردوات.. وكيف نتشهر و اتجيني شويا فلوس يبغضني فيها و يحب يقسم معايا، توا يعجبكم هذا؟
و الله كان ما جيتش انحب الشهرة و حاشتي بفليسات الشهرة ، لا عدت انحل الفايس بوك ولّا مانسكروا ونخرج منو من الساعة هذه..

Hnani 7KAYIT HNANI