موش صحيحة 143و نطلبوا دوبل كوركسيون
اليوم، الطقس ربيع ، و الشميسة زارقة، هزيت روحي و قلت نمشي نعمل دورة في الربط… كيف العادة خويا الحاج كلوف شادد راس النهج و يتمتم وحدو…
صباح الخير يا حاج ، نهارك زين يا هناني ، فين قاصدة ربي؟
قلتلو: يا حاج راني حبيت نمشي نعمل دورة في الربط، وانشوف حوانت التونسي نلقاش فيهم حويجة جديدة.. قالولي سكروا منهم برشا حوانت…. وانت شبيك قاعد اتكرم وحدك؟
قالي: ما تفرجتش على الجزيرة البارح؟ ولّا باقي مازلت كيف العادة مع الفرنسيس؟
قلتلو: ان شاء الله خير يا حاج… أشنوا الجديد؟ راني نعرف أخبار الجزيرة ما فيها كان إلّى يوجع القلب…
قالي: مشكلة يا هناني… العاالم حطنا في المرتبة 143 … اتصوّر الفريق الوطني تولّى رتبتو 143؟؟
ضربت على صدري و قلتلو: اللطف علينا يا حاج كان انجيو 143 … و الله كونش راهو المدرّب و المسؤولين متاع الجامعة و الوزير متاع الرياضة ، طارو في لحظة… مالا يا حاج!! علم الربط في الرتبة 143؟؟؟ يستحيل الربط يقبل الشيء هذا…
قالي: بالشويا على روحك يا هناني، شفت كيفاش دخلت بعضك على الفريق الوطني متاع الكورة؟؟ و ردّيتها علم و درابو الربط …
مالا يا حاج، ماتقلّيش فمّا حاجات أخرى غير الرياضة يتهز فيها الدرابو؟… عاد الله خير كان يولّى 143 !!!
يا هناني، توا نعرف إلّى مخك حدو حد الكورة، و صداء المحاكم ، و أخبار مهتّد و نور… و رغم هاكا باش انقلّك إلّى الربط جاء في المرتبة 143 في التعبير الكتابي و الشفاهي…
ربي يلطف بينا يا حاج، بلاد ما تقراش، ما تطالعش،مالا با ش ترسب؟؟؟
ههها ضحّكتني و ما عيني في ضحك يا هناني، ولّيت تتكلّم بالعربية؟ اييه نعم يا هناني، ربطنا دوبل، و التلافز اتعاير فينا و اتقوللنا يا مدوبلين، و حاشاكم ، يا بهايم في التعبير الكتابي و الشفاهي … ماعاد شيء يتخبا يا هناني، توا كل شيء بالفضايح..
أشكون علمهم بالرتبة متاعنا؟تلقاه واحد من الربط ماهوش باهي ، هو إلّى هز بطاقة الأعداد متاع الربط و وراهولهم!!
أنا ، و راسك يا حاج، كيف يدوبل واحد من ولادي، لا نقول لحتا بشر راهو ولدي دوبل… انخاف عليه من ولاد الحومة ، يعبدوه ويولّيو في جرتو و يقولولو يا مدوبل، يا مدوبل… ماهو يتعقّدلي يا حاج، و ممكن يقطّع الكتب الكل و ما عادش يمشي للمكتب…
بطاقة الأعداد ولّات اتجي من البرّة يا هناني ، و العالم يسمع بيها قبلنا… ماهو الإمتحان مشارك فيه العالم الكل … كيف دورات كأس العالم ، ماك ما تفهم كان بلغة الكورة انت!! و الشيخ ماشي في بالو باش يخبي الرسوب ، على جماعة الربط ، لكن يا حسرة على زمان بوعنبة ، توا شيء ما يتخبا…
مالا كيفاش توا؟ آش باش يعمل الشيخ قدّام العاالم ؟ يلزمو يشوف كيفاش يسترنا ، ويشجّع على المطالعة و يعمل في كل زنقة مسرح، قالوا المسرح باهي ينحّى التلعثيمة و التوكويك و حمورية الوجه..
ما قعدش ساكت الشيخ، كذّب حكاية الرسوب، و عاقب الناس إلّى طلعت الخبر في الربط.. و نبّه على كل واحد ينطق بكلمة مدوبل… و زاد بعث للتلافز العربية ممثّل معتبر، قاري مسرح واقتصاد ما عندوش التلعثيم ، و يعرف يحسبها و هي طايرة، باش قال للعالم الكل، إلّى ربطنا موش مدوبل، و العدد و الرتبة غالطين ، و يطالب باش يعاودوا تقييم ورقة الإمتحان متاع الربط… كيف ما انقولوا دوبل كوركسييون…
ربي معاه يا حاج، هي كلمة دوبل كوركسيون فيها كلمة دوبل و ربي يستر
